óuriginoLi 120 an dóu Prèmi Nobel
K. Michaelsson
Pareigu dins Prouvènço d'aro, n° 415, desèmbre 2024
En aquelo annado Frederi Mistral se festejo li cènt vint an de l’atribucioun de soun Prèmi Nobel, que pecaire, d’un pau mai, agantavo pas pèr l’encauso d’uno marrido traducioun de Mirèio. Avèn trouba un temouin d’aquéu tèms que raconto bèn tout acò.
Coustatè d’abord que, tre la proumiero destribucioun dóu Prèmi Nobel, en 1901, se discutissié la candidaturo de Mistral. Li prouvençalisto alemand èron demié aquéli que travaiavon em’ aplicacioun e tenacita en visto d’aquelo candidaturo. M. Emile-G. Léonard cito uno letro curiouso de Mistral à Gastoun Paris, datado dóu 19 de janvié 1901 : “ Sabe pas en dequé counsisto aquéu grand prèmi Nobel pèr lou quau siéu prepausa pèr li prouvençalisto alemand, causo qu’ignourave tambèn. Aquéli tèsto d’Óutro- Ren soun d’uno persistènci e perseveranço estraourdinàri, quouro an enqueissa uno idèio. Sabès, verai, que Koschwitz vèn de publica uno edicioun de Mirèio sènso traducioun à l’usage dis estudiant universitàri, edicioun que dèu se vèndre, estènt que lou libraire n’a paga li dre d’autour. Mai ai agu demai la chanço de trouba un tradutour entousiasto, M. Aguste Bertuch, de Franfort, que vai de vilo e vilo, dounant de counferènci sus lou felibre de Maiano e si pouèmo. Lou 6 de febrié, pèr eisèmple, uno meno de fèsto literàri sara dounado en moun ounour à Zuric e à l’estiganço de moun infatigable rapsoudisto.” Leoun de Berluc-Pérussis, noun soulamen “ lou menistre plenipoutenciàri de Santo Estello en Itàli ” mai lou “ Menistre dis Afaire dóu Felibrige ” en generau, s’es forço ativamen en visto d’aquelo Koschwitz es un autre proupagatour, estremamen zela. La proumiero letro de Berluc à prepaus dóu Prèmi Nobel es datado dóu 27 de janvié 1901 ; lou 8 de febrié, Mistral respond, entre autre, que “ aquéu prèmi Nobel… m’empacho forço mens de dourmi aujourd’uei que se me toumbavo deman ” ; lou 10 de febrié, sèmblo metre soun esperanço dins li prouvençalisto d’Upsal. Au mes de nouvèmbre de brut venènt d’Estoucòume s’espandissien : Berluc canto vitòri, de felicitacioun proumierenco soun adreissado à Mistral, mai tambèn un grand noumbre de letro escoumtant sa nouminacioun e soulicitant uno ajudo pecuniàri, - Mistral fasènt l’adicioun d’aquéli demando, n’arribavo à 500.000 franc-or. “ L’Emperaire dóu soulèu ”, qu’à sis ouro, avié de doun de diploumate, espremiguè à Erik Staaff, - èro en 1904 -, soun entousiasme pèr la chausido de l’Acadèmi en 1901 : la chausido de Sully Prudhomme. Lou 7 de desèmbre encaro, mau-grat qu’aguèsse pas agu de nouvello de Suèdo, Mistral es óutimisto — tres jour avans la sesiho soulenno à-n-Estoucòume. Ges de letro de Mistral counservon si reacioun davans lou resultat counfiermant ço qu’escrivié lou 31 de mars : “ Mai la “ branco dis aucèu ”, aquesto fes, es un pau trop auto ” emé l’apoundoun filousofe : “ e pièi fau pas que tóuti viscon ? ” Berluc, bèn entendu, escriéu uno letro furiouso, dins la qualo escound pas quènti sentimen l’ispiron au respèt di franchimand, mai “ noste proucès es pas juja, mai simplamen remanda… Acabas vòsti Memòri, e lou Felibrige aura, l’an cinquanten de Font-Segugno, la gau de li vèire courouna pèr l’Acadèmi d’Estoucòume, au mitan d’un plaudimen universau.” D’efèt, se pòu dire que l’afaire es estado remandado, fauto d’estrucioun sufisènto. Lis estùdi prouvençau an trouba sa plaço sus pas dins tóuti - pèr lou diploumo di lengo roumano. Lou mouvamen di Felibre es esta trata, tre 1873, pèr Th. Hagberg, proufessour d’Upsal, en quau se dèu tambèn de traducioun en vers, entre àutri de Mistral, traducioun que soun de luen li meiouro qu’eisiston dins nosto lengo. En 1900, Augusta Ljungquist baiè uno traducioun en vers noun-rima dóu proumié cant de Mirèio ; en 1904, reüniguè dins un pichot voulume sa traducioun di tres proumié Cant emé lou tèste prouvençau en regard. Aquelo traducioun es pas sènso merite ; soulamen Mllo Ljungquist avié de-segur pas de doun de pouèto, e la chatiso que s’es reproucha pèr fes à Mistral se trobo bèn ranfourçado dins aquelo versioun suedèso. Pamens, es interessant d’óusserva lou renouvèu d’interès pèr la lengo e la literaturo di felibre que se manifèsto en Suèdo dins li proumiéris annado d’aquéu siècle. Dos tèso d’Upsal soun counsacrado à la lengo di felibre : uno soustengudo en 1903, tratant di sufisse aumentatiéu e demenutiéu, pèr Mmo Gerba Ostberg, l’autro pareigudo en 1905, s’óucupant de la sintàssi di prounoum persounau, e qu’a pèr autour V. Brusewitz.
L’eicelènt proufessour e saberut qu’èro P.-A. Geijer, ansin que soun futur sucessour Erik Staaff soun pas esta estrangié à-n-aquelo óurientacioun. Pamens, óutro aquélis estùdi gramaticau, interessant unicamen lis especialisto, l’annado 1904 a vist parèisse divers travai suscetible d’atriva l’interès dóu publi suedès e de l’Acadèmi sus Mistral e lou Felibrige. E. Lidforss, proufessour ounouràri de l’Universita de Lund, rapourtaire dóu Coumitat Nobel pèr li literaturo franceso e espagnolo, publico un article sus Mistral dins la revisto Ord och Bild. M. Boheman, que en 1897 avié revira Li rouge dóu Miejour de Fèlis Gras, baio un espausat de l’istòri dóu Felibrige, qu’a agu l’ounour un pau inespera d’èstre tradu en francés : “ Précis de l’histoire de la littérature des Félibres ” Avignoun 1906. Enfin, C.R. Nyblom, éu-meme membre de l’Acadèmi, fai parèisse sa traducioun de Mirèio, la souleto que siegue coumplèto, en tèms utile pèr que sigèsse couneigudo pèr lis Academician avans lou vote. À coustat d’aquéli tentativo pèr atira l’atencioun sus Mistral e soun obro, lis voues encitant direitamen l’Acadèmi à i’atribuï lou Prèmi literàri mancavon pas ; un dis apèu fa pèr quaucun de forço avisa regardo coume uno justo countribucioun au cinquantenàri de la creacioun dóu Felibrige d’atribuï en 1904 lou Prèmi Nobel de literaturo au chèfe d’aquéu mouvamen. Lou Coumitat dóu Prèmi Nobel coumpausa de sòci de l’Acadèmi, recoumando em’ entousiasme Mistral, mai au sen de l’Acadèmi lis óupinioun èron forço divisado. més : Mistral a degu parteja lou prèmi emé lou dramatisto espagnòu Jóusè Echegaray.
Dequ’es arriba ? Echegaray se trobo sus li listo de candidat : en 1902, lou rapourtaire dóu Coumitat Nobel, Ed. Lidforss avié publica un article sus éu, article qu’es d’un entousiasme bèn moudera. S’es jouga si pèço à-n-Estoucòume : “ O locura ó santidad ”, tre 1882 ; “ El gran Galeoto ”, en 1902. Aquéli dos pèço soun estado publicado dins de bòni coundicioun. Après la sesiho soulenno de la destribucioun di prèmi, lou 10 de desèmbre, li resson de la prèsso soun en generau forço favourable, e ço qu’a lou mai frapa es un article de Ruben Berg, precursour dis estùdi d’estilistique en Suèdo. Saup dequ’escriéu e escriéu bèn. La fin de soun espausat es neto, justo, dis de causo essencialo e manco pas d’aluro.
J. Vising dins si Memòri parlo d’uno vesito qu’a facho à Mistral en 1913, e n’en pren l’escasènço pèr dire coume, à soun avis, s’es facho l’atribucioun de la mita dóu Prèmi Nobel à Mistral. Vising se figuro que i’aurié agu l’entencioun de douna lou prèmi entié à Mistral, mai gaire avans lou vote a pareigu la reviraduro de Mirèio pèr C.-R. Nyblom, “ traducioun qu’a coumpletamen desnatura l’óuriginau ”. Lis eisèmple qu’a reüni Vising counfiermon soun apreciacioun, e sarié eisa de li multiplica : rimo trop facilo e quàuqui fes paroudico, voucabulàri que trantraiejo entre li mot noble e li terme ridiculamen poupulàri. L’estile pouëtique dóu siècle XX en a de coustat que, pèr lou legèire mouderne, podon parèisse caricaturau, e Nyblom èro nascu en 1832, mai sus aquéu poun lou jujamen sevère de Vising rasseguro, nascu en 1855, es esta, touto sa vido, soulidamen estaca i normo de sa jouinesso. Dóu rèsto, lou soutisié que se poudrié eisadamen escriéure en pescant dins aquelo versioun sarié proun riche meme en fasènt abstracioun d’aquéli tra. Or, avèn aro la paraulo dóu secretàri atuau de l’Acadèmi que prouvo que la supousicioun de Vising èro eisato : “ Mirèio a agu lou mal-astre de parèisse avans lou vote de l’Acadèmi, dins uno traducioun estremamen mediocro, degudo eilas ! à-n-un academician, e la resulto dóu vote a amena un coumproumés : lou partage dóu prèmi entre Mistral e Jóusè Echegaray.” Uno reviraduro de Mistral es toujour uno entre-presso risaco : l’estounanto richesso de sa lengo à la qualo l’escrivan i’arribo pas sènso labour ni repentido, ansin que lou fai ressourti l’article de M. Léonard ; la souplesso, l’espressiveta, l’espountaneïta, la facileta de crea de derivat dins la lengo prouvençalo, sa repugnanço à segui unicamen li grand camin de la resoun resounanto ; vaqui autant de trabuquet pèr lou tradutour. Uno autro dificulta nais de la tendesoun necessàri entre lou coustat umble escoulan dóu grand Óumèro e la resoulucioun de canta que pèr vautre, o pastre e gènt di mas. J.-K. Larsen coustato que meme dins la versioun de Mistral bèn de nuanço se perdon, e se mesfiso di traducioun de Mirèio. “ Aquéli traducioun, perseguis de dire, podon gaire, la maje part dóu tèms, servi qu’à-n-uno óurientacioun superficialo sus lou countengut dóu pouèmo ”. Mai d’un tradutour s’es, de-segur, en desespèr de causo, rapela lou mot dóu vièi tradutour d’Óumèro, en pensant e belèu en disènt : Car legèire, aprenès lou prouvençau e brulas ma traducioun. C.-R. Nyblom a pas liéura sa traducioun de Mirèio au cremadou, ço qu’a fali cousta à Mistral un prèmi Nobel, ço que de tout biais a priva lou Museon Arlaten de la mita de la soumo qu’aurié, de-segur, reçaupu encaro de la man generouso de Mistral.