óuriginoII
-Mai que nous dias aqui, Moussu Cabanel ? Li vèn Pèire, un pau souspres.
-Vous diéu en tóuti qu'ai de novo que vous van vira lou sang.
E lou vièi, finòchou, espèro que lou butoun pèr que couonte l'istòri. A lou biais, e mestrejo soun publi.
-Alor zóu, Papet ! nous la countas o nàni, vouasto istòri ?
-Bouon. E bè vaquito : Aièr au sero, èri mounta 'mé moun pichoun troupèu adaut au Gros Cervèu. Sabès qu'ai quàuquei cabro e quàuquei fedo ? Leis erbo li soun bouano pèr élei, que l'a pas fouaço mounde que trèvo l'endré, e gié de vouaturo pèr embruti lei planto. E puei l'a d'èr, adaut, e la visto m'agrado. Èro dins lei dès ouro, dès ouro e miejo, e m'alestissiéu pèr davala, que lou soulèu si couchavo. Ai moun oustaloun pas luen d'aqui. Alor, rabaiéu meis afaire, sìbli moun chin, e zóu ! en camin ! Pèr ana plus vite, à luego de suivre la routo qu'an facho, aquelo que toumbo au Pue-Redoun, avèn pres d'acóurchi de tras lei coualo. E l'a un moumen, dins un valat qu'èro ja bèn sourne, davans iéu, entèndi quoucarrèn courre dins la garrigo. A-n-aquel endré, es proun auto, m'arrivo à la taio. Fahié tròu de brut e de mouvamen pèr que siguèsse un lapin o uno lèbre. Mi siéu pensa qu'èro un senglié qu'avié descendu pròchi la coustiero. Tèms en tèms, n'a coumo acò que s'esmarroun, o que leis ome li fan pas proun pòu. Aviéu pas lou fusiéu. L'aguèssi agu que m'aurié sarvi en rèn de rèn, que lou proumèni pas 'mé lei gròssei cartoucho. Mai enfin, m'aurié bessai un pau rassegura. Que coumençàvi de m'inquieta un pau. Fòu que vous dìgui que moun chin, es un bouon cassaire, e qu'à l'acoustumado, a pulèu tròu envejo de li courre à l'après, ei bèsti, mume quouro sian en trin de recampa lou troupèu. M'arrivo souvènt de duvé lou crida.
Mai justamen, aièr au sero, avié la petacho. Si serravo contro ma gambo, quilavo coumo un cadèu, la coua basso, e l'èr estrancina. E puei un senglié, quouro si mete à grata pinedo pèr t'escapa, fa soun bouon kiloumètre. S'aplanto pas à peno un pau pu luen à t'espera coumo un couioun. E bè aquel animau, vo ! Garçavo lou camp, e s'arrèstavo vint mètre d'aqui. Aquéu de còup ! Alor m'imaginèri tout : un vièi chin abandouna, un agnèu perdu, o un pichoun que farié lou couièti. Sàbi pas, iéu, que s'escoundrié pèr juga eis Indian, e que iéu, 'mé moun capèu, m'aurié baia lou role dóu cow-boy. Fin finalo mi siéu pensa "Ho ! Acò coumènço de mi fa caga, fòu que pete o que digue ce qu'es !" Ai manuvra 'mé moun chin e lou troupèu pèr que caminessian en fènt la mita d'un ciéucle. Plan-planet, avèn suivi lou troumpo-couioun fìncou lou founs dóu valat, que fenisse en cuou de saco souto un pichoun baus. La cauvo èro agantado. Poudié pas mai s'escapa. Alor ai fa avans, d'aise d'aise, 'mé moun bastoun dins ma man. La cauvo cercavo de fugi, courrié de gaucho à drecho. Va vihiéu ei bartas que boulegavoun. Arriva à tres o quatre mètre, aviéu la garrigo au daut dei cueisso. Èro pas facile de camina. Fahié quàsi nue, e li viiéu pu bèn clar. Sourtèri ma lampo à pilo, e li mandèri lou lume dessus, dins lei bouissoun que li entendiéu un respir un pau court. Ho tron de pas Diéu ! Entre leis erbo, viéu uno caro. Pas uno caro de crestian, nàni, mai uno meno de figuro de diable, touto tourdudo, em'uno pèu roujasso, e bruto ! De pichouns uei tout negre e tout lusènt que mi fissavoun, e sus la tèsto, de puou d'un ai rouge ! Uno ourrour ! N'en siéu resta palafica. Ai pu mume agu lou couràgi de boulega 'n'auriho.
Tout lou mounde escouto. Degun a quinqua pèr demanda d'entre-signe. L'a dins la banco un silènci de jou d'eisamen au Licèu de La Sèino. La pouarto es tancado duberto pèr proufita un pau l'èr frès dóu matin, e un cliènt que rintro destourbo pas lou mounde. Degun lou remarco. Éu si demando mounte desbarco, se toumbo dins uno ataco de voulur, e se farié pas miés de s'emparti sènso que degun si n'avisèsse. Mai la curiouseta estènt mai fouarto, regardo aquéu vièi que barjaco, e chanjo d'avis. Se l'a agu un escaufèstre, n'en soun à lou racounta, si penso, de tout segu, e poudra dire que l'a viscu, sènso prene gié de risco. Pren l'èr interessa, e si plego à la lèi generalo, coumo fèn tóuti dins aquèsteis escasènço, e croumpo un chut. Si melo à la troupo deis escoutaire, que fan lou round davans lou pastre, d'esquino au banc. Pèire, darrié, n'en pèrde pas 'no brigo.
-E qu'avès fa ?
-Bè, moun chin, de la pòu, ourlè à la mouart, d'un biais que mi foutè la car de galino. Lou diablas, tout d'un tèms, sautè en l'èr, coumo se li avien brula lou cuou, digo, un putan de bound ! s'arrapè ei roucas, e remountè lou baus coumo 'no mounino. Mai l'ai bèn vist, èro pas 'no mounino, a lei pato coumo uno cabro, emé dous gros det, un pau long, e d'arpo qu'an l'èr de bèn pousqué derraba leis uei. Es grand coumo un gros chin, emé lei puou d'un ai, rouge. Es un moustre. Ai destrauca un moustre !
Lou darrié cliènt coumenço de si demanda se leis àutrei l'escoutoun, lou papet, pèr respèt, o se cresoun vertadieramen à sei couiounado. Si vis clar que desparlo, pecaire, à soun àgi es gaire estounant. Mai degun laisso vèire ce que n'en penso.
Acò lou tafuro.
-Alor, mei bèsti 'mé iéu, avèn parti de l'autre coustat, lou pu vite poussible, e sian rintra à l'oustau. N'ai pas pouscu plega parpello. Crèsi qu'ai vist lou diable (si signo) e 'cò fa pòu, sabès. Aquèstou matin, d'ouro, ai leissa lou troupèu au chin, e siéu vengu va dire au Mèro.
D'ourdinàri, dins talo escasènço, lei gènt an pas lou tèms de feni soun istòri que leis àutrei lei coupoun, lei rescoupoun, demandoun d'esplico, apoundoun sei souveni à-n-élei, enfin, s'en mèloun. Mai aquèstou còup, degun mutè. Enjusco l'acabado. E quouro lou bergié s'arrèsto, s'entènde soulamen Pèire sibla d'èstre esbalauvi. Talamen que lou vièi a mes de couar dins sa dicho que degun penso à si trufa de sei mascarié.
Es après un moumen que lou mounde si mete à parla, à coumenta l'evenimen.
Lou paire Miquel, qu'es de La Tourrello, un ròdou au pèd dóu Gros Cervèu, fa :
-Aquelo tubo ! E que sian pèr faire, aro ?
-N'en parla au Mèro, tè ! Veira ce que fòu faire, li vèn Madamo Cabanis, es soun mestié.
-Saupre se va creira, Pèire dis.
-Coumo, se va creira ? Mai racònti pas de mussonjo, iéu ! Que lou tron de Diéu mi cure se…
-Va sabèn, va sabèn, li respouonde Pèire, mai enfin es un afaire estraourdinàri, acò. Bessai van dire qu'avès mau vist, que fahié quàsi nue, que sias un vièi que travaio dóu capèu, qu'enventas acò pèr faire parla de vous, que sàbi iéu…
-Alor agantarai lou Mèro ei braio e lou trinassarai mai vèire au Gros Cervèu. Faren l'espèro e lou devistaren mai, lou diable. Es que mi vau pas leissa regarda coumo un niais, pamens ! E sa va fòu, faren 'no batudo e l'agantaren !
-S'es lou diable de bouon, poudra vous escapa quouro e coumo voudra, li rebèco Boufarel, lou darrié arriva.
-Mai nàni, couièti, qu'es pas lou diable. Proumié, es pas banaru. E puei rèn que lou proumié còup aurié passa pèr maio e l'auriéu pas vist. Nàni, es uno bèsti fèro, uno meno de moustre. Acò arrivo, tambèn, entre d'animau que nourmalamen van pas ensèn, de faire de pichoun moustras. O bessai s'es escapa de sàbi pas mounte, d'un zoo vo d'un labouratòri d'esperiènci.
-E se lou diable avié vougu vous faire pòu ?
-E perqué ? Que li ai fa ? Ha, que, dias de cagado. Siguen un pau serious. Es un moustre qu'interèsso lei savant, e pas mai ! N'en vau parla au Mèro. Bounjou en tóuti !
Acò di, parte. Lou regardoun camina d'esquino pèr la carriero Grabié Pèri, vers la Coumuno.
***
A la banco, dempuei vue mes, l'a uno estagiàri. Uno fiho bruno, que li dien Naïs. Vinto-sièis an, poulido coumo tout. Minçourleto, emé lei chivu coupa court, leis uei e la pèu brounza ivèr-estiéu, naturalamen. Ni grando nimai pichouno. Pèire, qu'es carga de li aprene un pau lou mestié, arrivo gaire à saupre s'es crentivo o proun seguro de sa persouno pèr regarda lei cauvo de luen. A parla mant un còup em'elo, d'après-dina entié davans l'ourdinatour. De fes que l'a, la paraulo s'endraio devers d'àutrei sujèt. Parloun dóu mounde, de la soucieta, fan de filousoufìo. Mai au founs, si parloun d'élei. Fan counouissènci. E dins leis uei que s'óusservoun, d'àutrei mot passoun, tranquile e dous.
La semano passado, de travaia sus l'ourdinatour, va foulié bèn : revèire la situacien dei comte d'acien de tóuti lei cliènt de la banco. Un gros travai. Naïs duou si n'en sarvi pèr alesti uno analiso escricho, uno meno de raport d'estàgi, coumo dien. Tres journado, li an passa. E la segoundo, elo èro souleto à si despegouia 'mé la machino, que Pèire passè lou jou à Marsiho, au sèti generau, pèr d'acampado amenistrativo. Quatre còup dins la journado li telefounè pèr vèire se tout anavo bèn.
O pèr lou plesi d'auvi sa vouas. Douçour e vido.
Marsiho, pamens, es un endré que lou pren ei tripo. Es pas que siegue uno vilo bello, nàni ! Mai, pèr escasènço, es dins uno clinico marsiheso, pròchi lou Port-Vièi, que sa maire acouchè d'éu. Dóu coustat de sa maire, es mai que tout de marsihés. E coumo lou mourtié sènte toujou l'aiet… Pèire aimo de senti la frenesoun founso qu'espilo d'aquesto vilasso. En gié d'autre endré li sentè jamai talo mescladisso d'ancianeta dei racino e de boulegun mouderne. Leis oustalas marsihés dei siècle 18 e 19 an coumo d'óulivié fouaço vièi e raplot. Dirias que sei muraio si countunioun en foundamento prefoundo, arrapado enjusco lou dessouto de la crousto terrèstro. Maugrat leis escapamen dei vouaturo, maugrat la calour, maugrat un soulèu qu'esbléugisse quatre jou de cinq, l'èr l'es sèmpre linde, trasparènt. Lóugié.
Es uno vilo qu'a uno amo, uno amo poupulàri. Sèmblo de recounouèisse lei gènt que l'arrivoun mai après li èstre adeja vengu. Pèr li dire "benvengudo, sias au vouastre, e vous ai garda vouasto plaço fresco entre mitan lei foulo pèr carriero".
Marsiho crousadou de camin que cadun pòu si li pauva un moumenet o touto sa vido, de mounte que vèngue, mounte que vague. E jamai degun prenguè Marsiho. Es Marsiho que ti pren, siguèsses mume rèi de Franço o de Navarro.
Marsiho compact-disc de Mieterrano, Marsiho-Naple, Marsiho gregralo, Marsiho-Armenìo, Marsiho-Corsica, Marsiho-Piemount, Marsiho-Ligouro… sèmpre e toujou Marsiho pouarto dóu Levant. Fòu agué ressenti lou brèu bàti- bàti que vous gounflo lou pitre lou tèms de davala lei grands escalié de Sant- Carle, emé la Bouano-Mèro en fàci, lei platano dóu balouard d'Ateno e lei téulisso rousenco passido espandido vers la Mar, pèr coumprene ce qu'ana à Marsiho toco en Pèire.
Un Marsihés en soun dintre rèsto toujou "fièr d'èstre marsihés", coumo va dien leis afeciouna dóu baloun e lei cantaire de Massilia Sound System. Mume aquéu que si foute dóu baloun coumo de sa proumiero camié tiro l'auriho quouro s'anouncio que l'OM a vincu. Subretout s'a vincu Paris… !
Emai tout aquèstou grouün de sentimen e de pensamen faguèssoun camin dedins Pèire, mai o mens counscientamen, lou destourbè pas de pensa à "sa" Naïs.
Lou darrié jou, sus lei douas ouro de l'après-miejou, tout èro acaba. Avien courregi l'analiso de Naïs, l'avien estampado, e Pèire coupè la machino. Aqui, silènci. Uno fin d'ativeta, quouro li avès douna de tèms e de voio, es un vueide que si trauco au mitan de l'eisistènci. Poudien pas feni 'qui. Dire "A si revèire" e zóu ! pu rèn. Pèire parlè lou proumié. Sabié que dins mens d'un mes, l'estàgi acaba, Naïs partirié de l'agènci. Mounte ? Saupre. Acò, poudié pas si l'empassa. L'idèio de pu passa aquélei bèu moumen ensèn, au toco-toco, avié l'empressien qu'un mounde s'abóussounavo. Que sa vido sarié griso. O pulèu, que retournarié dins la grisaio sentimentalo que marcavo sa vido dempuei que sa frumo e éu s'èroun rendu comte que s'eimavoun pu. E que s'èroun dessepara. De gris, sei jou d'ome èroun vengu gai. Si languissié de la vèire, mai subretout de li parla, à l'estagiàri. Coumençavo de coumprene que l'eimavo.
-Festejan 'cò ? Que ?
Naïs li fè 'no respouonso ni car ni pèis, un pau geinado, un pau urouso.
-Zóu, que, s'ameritan bèn un pichoun soupa. Avèn encaro tant de cauvo pèr si dire. Vouas bèn ?
-E bè vo ! Quand ?
-Quand pouas ! Digo-mi, dimars que vèn ?
-E… Nàni, pouàdi pas. Dijòu, pulèu. Vai ?
-Si que vai !
-Vendras mi querre à l'oustau ? Ai un pichoun apartamen balouard Lautier, à la "Croix du Sud".
-Sàbi mounte es. Just à coustat d'aqui. A vuech ouro ? Lou tèms que m'óucupi de mei pichoun avans que la baby-sitter arrive.
-Brave !
Aquéu de còup lei destimbourlo tóuti dous. Saboun plus tròu de que si dire. Naïs s'inquieto un pau. Saupre s'aquel ome, pulèu dous e respetous, cerco pas soulamen de fura un pau ? Es elo que lou fa mai parla, pèr s'esclargi leis idèio. Li demando francamen ce qu'a dins lou coucot. Estènt qu'entre ome e fremo… Li douno l'óucasien de li racounta mounte n'en es. La separacien d'emé sa frumo, la pòu de perdre sei pichoun, la fin d'un amour, l'amar de s'èstre engana. La tristesso puei. La vido estadisso, sènso erso e sènso vènt. Uno bello ruissido dins lou mestié, segu, e de bèus enfant, de bouonur e de joio em'élei, segu. Mai mens de rire, mens de sourtido, mens de goust. Uno meno de routino que si li nego plan. A trento-cinq an, l'empressien de veni vièi. E tout d'uno l'envejo de faire autro cauvo que travaia e s'óucupa dei pichoun. Lou couar que bate un pau mai fouart. Uno boulo à l'estouma. De sensacien novo. La vido que revèn, la gau qu'escafo lou gris. Uno persouno pèr parteja lou founs de se. Pèr parla clar. Pèr parla verai. Bessai mume pèr pensa à deman.
Si quitèroun d'un gros pountoun que Pèire n'en gardo dempuei lou souveni sus la gauto.
Acò s'es fa divèndre passa. E dempuei, Pèire espèro. Pas facile d'espera. Si sènte coumo un jouèine de dès-e-vuech an. Comto lei jou. Assajo de s'interessa en quoucarrèn. Mai es pu fouart qu'éu : si penso qu'à dijòu. Dijòu, es luen. Lou week-end, ma fisto, tant s'es escourregu. Emé lei pichoun, em'uno gau novo. La joio si melo puei d'à cha pau d'impaciènci. D'un besoun nouvèu. Vèire Naïs.
Naïs que passo la semano au sèti de Touloun. E qu'es pas 'qui.
Estou sero, la sounara.
***
Davans lou municipe, sus la placeto que li dien plaço de la Republico, coumenço de l'agué de mounde. Anfos, lou vièi pastre, croumpo Var-Matin à la boutigueto. Saludo la marchando de flour, e rintro. Aqui, lou gàrdi municipau ; un enfant dóu païs que vai sus sei quaranto-cinq an, mai qu'Anfos counsidèro toujou coumo un pichoun.
-Adiéu, Anfos, que vous arrivo ? Vous vian pas souvènt au municipe ?
-Adiéu, fiéu, m'arrivo que vouàli parla au Mèro, dessuito. Ai quoucarrèn de mai qu'impourtant pèr li parla.
-Òu, mai sabès que s'avès pas rendès-vous, es pas poussible. Es fouaço óucupa. Sanàri es pu lou vilàgi d'antan. Es uno grosso viloto, aro. Douno d'obro. Sian mai de dès milo, que !
-M'en fóuti ! Siéu d'Auruou ! Lou vouàli vèire, e lou veirai ! Senoun mi dien pu Anfos Cabanel ! Arrenjo-mi 'cò, vai, que siés brave. Es pas pèr de couiounado.
Pren lou telefoune, e barjaco coumo 'cò de tout e de rèn 'mé la secretàri dóu Cònsou. Blago, galejo, e li fa dire d'o pèr demanda à soun patroun se pòu acourda quàuquei menuito au vièi Anfos. Marcho.
-Mounto, t'espèro.
-Marci.
Li guincho d'un uei.
La secretàri lou fa rintra dins un burèu mouderne, gaire grand, em'uno fenèstro duberto sus lou port.
-Alor, Moussu Cabanel, coumo van lei bèsti ?
-Bèn, Moussu lou Mèro, bèn.
-Que mi voulès dire ?
Anfos li raconto soun afaire. Lou Cònsou l'escouto gentamen. A l'èr entrepacha :
-Moussu Cabanel, tout acò demando d'èstre verifica. Farai lou necessàri.
-Coumo, verifica ? Mi cresès pas ?
-Voui, voui, que vous crèsi. Mai es dins ma cargo de bèn counouisse uno situacien avans que de faire qunto cauvo que siegue. Es moun role d'èstre prudènt. De tout countourroula avans de prene uno decisien. Lei gènt renarien s'èri pas proun serious, e que degaiàvi de tèms e de sòu publi en mi troumpant.
-Vo, va coumprèni.
-Fòu pas degaia pèr de bricolo. E puei avèn lei touristo. Fòu s'avisa. Vourriéu pas faire encrèire qu'es quoucarrèn de dangeirous se l'es pas. Que lei camp de tibanèu e lei residènci segoundàri à l'entour dóu Gros Cervèu an besoun de traire lou mounde. Pas de lou faire fugi. Aquéli gènt an puei lou dre de passa de vacanço tranquilo, parai ?
-E vo ! Enfin, veiren bèn. Mi dounarés uno responso, que ? L'ai destousca iéu, aquel afaire.
-Segu. Vous lou farai assaupre. Bouon, au revèire, Moussu Cabanel. M'escusarés, mai ai fouaço travai. Tenès-vous gaiard. E, n'en parlés pas, à degun, que ?
-Bèn lou bounjou, Moussu lou Mèro.
Defouaro, l'istòri coumenço ja de s'espandi, remarciant à madamo Cabanis, uno bravo basaruto de marcat, que si gèino jamai pèr metre sa peio à la bugado.
A dès ouro, au counsèu municipau, lou Cònsou n'en parlo à seis ajoun. Li recoumando bèn de teni 'cò secret, qu'es de tout segu de repepiàgi de vièi fada, mai que fòu surviha se va pas faire un estampèu, em'esfraia lei touristo. Subretout, li dis, fòu pas que la prèisso parle d'acò. Arrenjas-vous pèr mestreja lei courrespoundènt loucau dei jounau. E s'avès de novo…
N'en rigoloun un bouon còup. Mai que lou Cònsou.
A vounge ouro e miejo, lou counsèu es feni. Lou Cònsou lèvo la sesiho, e s'endraio 'mé dous coulègo à la terrasso dóu cafè d'à coustat. An passa uno bouano ouro rèn qu'à discuti li demando de permés de basti dins lou relarg de Boucèno e de La Piolo, de l'autro man de l'autorouto. Li a douna set.
***
A miejou e quàuquei bricolo, Pèire rintro à soun oustau. Sènte lou pebroun fregi dins lou courredou. Encuei, a pas lou tèms d'ana querre sei pichoun. L'oustau es vueide. Tranquile. Lei tourno-vènt soun crousa, e l'a que quàuquei rai de soulèu que traucoun l'escur. Fan tres rego sus lou sòu, e la póusso voulastrejo sus soun camin, entre la fenèstro e lei maloun. Pèire s'asseto dins lou radassié e regardo aquesto póusso. Saupre ce que l'a dins aquelo boulegadisso…
Fa fres. Lei brut de la plaço caloun. Cadun s'es enana dina. La calamo s'istalo, e s'entènde pu gaire qu'un rire mai fouart que leis àutrei de tèms en tèms. O la blagadisso d'apassiouna. Lei tourno-vènt tapoun lou lume, mai leis èstro soun duberto, e l'auro carrejo touto aquesto vido brassejanto.
Tres rego de lume. Pèire pantaio. Dijòu. Naïs. L'ana querre. Espera. Es luen, dijòu. De que li dira ? Li dire dessuito "Escouto, Naïs, siéu un ome ounèste, vouàli que tout siegue clar. Siéu pas en trin de fura. Cèrqui pas 'no frumo pèr passa lou tèms. O pèr coucha em'elo. Es tu pèr tu. Simplamen, e seriousamen." Li dire que siés amourous ? Es pas eisa. E bessai li va fa pòu. Nàni, siguen prudènt.
Assajo de-bado de pensa en quoucarrèn d'autre.
L'envejo de la vèire li tafuro lou pitre. De li parla. De la prene dins sei bras. Tant de douçour s'espandisse à l'entour de Naïs. De li parla, sarié ja pas mau. Mai coumo ? Quand ? Li telefouna de vèspre ? E se jamai toumbavo sus Magali ? Magali, es uno autro estagiàri. De l'agènci de Sièis-Four. Rèsto à l'apartamen de Naïs dins la semano, que vèn de Iero, e 'cò fa luen. Naïs e Pèire si soun proumés d'escoundre soun amista. Leis àutrei de la soucieta lou sachèssoun, mancarien pas de li vèire d'inegalita. A la fin de l'estàgi, la soucieta pourgira un emplé à sèt estagiàri. Sus sege. Ato, la councurrènci juego. Nàni, pas prene lou risco de toumba sus Magali. Recounouissirié la vouas de Pèire dessuito. An agu de sesiho de travai tóuti ensèn au sèti, à Marsiho. Alor, que ? Li manda de flour ? Perqué pas ? Es poulit. Mai siegue Naïs es pas 'qui, e lou pourtaire la manco. Siegue Magali va saup, e cercara d'aganta lou pèis. Bouon, vau miés espera dijòu.
Pèire a pas fam. Tout acò li fa 'no boulo à l'estouma. L'impaciènci.
S'acountènto d'un moucèu de froumàgi de cabro, d'un pessègue, e d'un còup de vin de La Roco, que croumpo à La Cadiero. Regardo leis enfourmacien à la telè en tubant uno bloundo angleso. Lou prefum nedo dins lou mèmbre. Coumènço de fa caud. Pico, Maumet.
Revèn sus l'istòri dóu pastre. De còup que fenissèssoun pèr n'en parla à la telè. Pèire si penso que lou pastre a de segu vist quoucarrèn. Belèu pas lou moustre que dis, mai quoucarrèn. Ato ! a di éu-mume, Anfos, que cresié pas ei mascarié. L'a panca peta un ciéucle au vièi. Avié l'èr sincèr e sena. Tè, èstou sero, anarai vèire. Mi fara 'no proumenado, e ai proun besoun de m'espaceja 'n pau. Mi sourajara un pau l'esperit.
Uno ouro e miejo. La banco douarbe à tres. Lou tèms dóu penequet. Pèire si coucho de tard e si lèvo d'ouro. A bèn besoun de durmi uno oureto après dina.
Durmi fa puei passa lou tèms.
***
A nòuv ouro, lei pichoun coucha, la bailo istalado davans la telè, Pèire es lèst pèr ana furna sus lou Gros Cervèu.
Avans de parti, s'embarro dins soun burèu, e souno Naïs. Sièis, sèt. Dès. Gié de respouonso. Es pas 'qui. Magali nimai. A pres lou risco, n'en pòu plus d'espera. Se toumbo sus Magali, e bè bouto, si n'en despegouiara.
Pren sa fiat blanco.
Tout en menant, reflechisse. A manda 'no telefounado à Cabanel vers lei quatre ouro pèr lou preveni de sa vengudo. Mounto lou balouard Lautier, e passo davans la Croix du Sud. La vouaturo de Naïs li es pas parquejado. Pancaro tournado à l'oustau. La sounarai vers dès ouro. Saupre se lou pastre acetara de mounta li moustra l'endré de sa descuberto ? Passo souto lou pouont dóu camin de fèrri, au camin de la Bau. Si rapello que tout pichoun, aquéu camin que coumènço à la pichouno capello Sant Rò, pèr éu, èro la debuto d'un mounde meravihous. Menavo à la pinèdo. "La" pinèdo. Aquelo que l'avié just après lou pouont, à drecho. Foulié travessa un ermas cafi de fenoun. Li cassavoun lei limaçoun. E puei li erias. Tèms en tèms, un trin passavo en dessouto. S'amusavoun à brasseja pèr saluda lei viajaire.
Après lou pouont, de residènci segoundàri. Passo l'autorouto emé lou camin de la Devinoto. De l'autre coustat, acata dedins lei ple de la mountagno, quàuqueis oustau, que soun 'qui dempuei fouaço tèms. Es lou quartié de la Tourrello, que tiro devers Ouliéulo, e que quàuquei païsan li faturoun encaro un pau la terro entre mitan de bèllei restanco d'óulivié. Endraio lou camin de Pue-Redoun, e arrivo lèu davans lou gros jas dóu paire Cabanel. Bèl endré, à l'oumbro dei pin. Lou soulèu es en trin de carga soun pijama d'aràngi.
Lou bergié l'esperavo asseta davans soun oustau, à la frescour de la serado. Dins uno ouro, lou soulèu cabussarié de l'autre coustat dóu mounde. Tout abiha, lou pastre. Pèire coumprèn que l'a gié de proublèmo pèr que l'acoumpagne au ròdou.
Laissoun lou troupèu emé lou chin, e mountoun coutrìo sus la mountagneto. Prènoun de tras la garrigo. Leis espino traucoun sei braio. Pèire a carga un vièi jean pèr s'apara lei gambo.
Parloun gaire. Un ànci sourne lei fa gounfle. Aquelo bèsti-moustre li foute la petacho. Susant e boufant, fin finalo rejougnoun lou ròdou.
-Li sian, fa lou pastre.
-Fan de pièd, es pas tròu lèu ! Aro lou fòu mai trouba. Duourian si dessepara 'n brigoun e faire coumo 'no batudo.
-Es acò. Zóu !
S'escartoun à 'n desenau de cano l'un de l'autre, e fan camin en picant sus lou sòu e lei roumias. Tèms en tèms, fan cala sei bastoun, si largoun uno uiado de coumpliceta, dous o tres mot pèr si baia de couràgi. E zóu mai de pica.
Fa mai de miechoureto que roumpoun lei bouissoun coumo de desrata. Fan pauveto, un pauquet descouraja. Tout d'uno, entèndoun lou sagan d'uno bèsti que garço lou camp.
-Duou èstre un senglié, fa Cabanel.
-Anen vèire, pamens. L'aura de piado. Es pèr aqui, souto la mato de pino. Sabès recounouisse lei piado ?
-Suivriéu uno mousco sus uno peto de lèbre.
S'aprochoun de l'endré. D'efèt, l'a la marco dóu passàgi d'un animau. De branqueto roumpudo, de fueio escrachado. De piado. De piado emé quatre pato, aquélei de davans redouno, aquélei de darrié pulèu carrado. Lou vièi n'en bretounejo. Es acò, segu. A jamai vist de piado coumo aquélei. Fan de puto l'an retrouva, lou bastardoun. Si mètoun puei en bousco. lou sentimen de davera la vitòri lei remplisse de joio. Blagoun, blagoun, blagoun 'mé de rire nervous.
-Ai jamai vist acò, dis lou vièi, camino coumo uno cabro, mai sèmblo qu'a de bato estraourdinàri.
Mai an bello à cerca, rèn. Rèn de rèn. Dous còup auvoun la fugido de la bèsti dins leis argeiras, à 'n trentenau de mètre. Mai de bado. Aro, fa nue. An sourti lei làmpi. Li vien pu proun clar pèr la bousco. Nafra. An capita que de coucha lou moustre un pau mai luen. E basto. Pèire, mai que tout, reno dins soun dintre. A pas pouscu vèire. S'assegura. Lei piado afourtissoun lei dire dóu vièi pastre, mai enfin, es pas parié.
-N'a proun d'èstre aqui subre, vai, avèn manca l'esco, fa lou vièi.
-E vouei. Sian poulit, aro ! Que faire ?
-Rintra à l'oustau e s'ana empaia, tè !
-S'esperavian encaro un moumenet, en istant mut, li avèn foutu la petacho, se l'esperan d'aise, bessai que si moustrara, e que s'entournara, aro que fa nue, aura mens pòu…
-Se vouas. Alor chùtou !
Miechouro d'espèro. Sènso quinqua, sènso quàsi boufa. S'auve pu que lou cri-cri dei grihet, lou cracina de la terro, la courso d'un lapin, lou vèntoulet que siblo. Tóuti aquéli brut de la nue que restountissoun dins soun menut. La naturo reprèn. O pulèu, leis ome l'entèndoun, élei que li soun sourd la majo part dóu tèms. Uno machoto. Lou vòu d'uno rato-penado. Souto lou lume discret de la luno, touto uno vido escoundudo qu'espèro l'absènci deis uman pèr respeli. Mai de boufe rau e de passàgi desfounsaire d'un moustre, nàni.
-Un trau en l'èr, jito Pèire, decebu. Aro fòu s'enana. La fiho que mi gardo mei pichoun a bèn lou dre d'ana si coucha.
-Aquelo pèiro mi fahié mau au cuou.
***
Es quàsi miejo nue quouro Pèire si recampo. La baby-sitter, uno jouineto de dès-e-sèt an, fiho d'uno amigo, l'espèro davans la telè.
Lei pichoun an pas boulega.