óuriginoIII
Dins lou relarg de Sanàri, entre Marsiho, Touloun, e Iero, es aqui que la Prouvènço es la mai fouarto, la mai espantanto, la mai espesso. De pertout, la roco blanco luse au soulèu e toumbo drecho dins lou blu founs de la mar. Lei darriéreis auturo deis Aup pounchejoun pròchi la Mar : es un ròdou apieja entre Mar e mountagno, lou Cap Naio, la Ginesto, Garlaban, lou Mount Ventùri e la Santo-Baumo, Lou Gros Cervèu, lou Mount Caume, lou fort de Sièis-Four, lou Faroun e lou Coudoun. Li a de barro, d'aven, de pieloun de pertout, tout cubert de bos e de garrigo. A pas dès kiloumètre enfre terro, l'a quàsi plus que de draio e de ròdou perdu qu'an serva sei noum prouvençau. Sian à quàsi milo mètro d'aut, bèn lèu, pèr aluca la mar. La naturo li sènte fouart, vigno, pin, garrigo, e sei coulour soun vivo à ti leva la visto. Subre lei bancau, l'a d'óulivié qu'an passa tóuti lei gielado dempuei que Berto fielo. Davans leis oustau, de figuiero giganto e de paumié plus bèu qu'en plen desert dóu Marò. Es un païs de calanco, de baus, de coualo e de plan. Lou soulèu lou seco, lou grasiho, nòu mes de l'anado, e lou mistrau l'escoubo la mita dóu tèms. La vido n'espilo à cha planto, à cha caiau, à cha erso, à cha bèsti, cha flour e cha regard. De tóuti lei caire, quiha sus lei coualo coumo Lou Bausset, Lou Castelet, La Cadiero, lou fort de Sièis-Four, em'estendu sus lei plan e la coustiero, coumo Bandòu, Sant- Cèri, Sanàri, Carqueirano, o Lou Plan, l'a de vilo e de vilàgi. La terro li es faturado dempuei l'aubo de la vido deis ome, e la vigno e la frucho soun lou vièsti d'aquéu ròdou astra.
Aquéu païsàgi de pèbre, de sau e de mèu, n'a plen lei pantai de Pèire. Si reviho aquèstou dimècre emé lou Gros Cervèu dins la tèsto. A bousca touto la nuechado.
En rintrant au siéu à miejo nue, a pas auja souna Naïs. Ato puei ! Saupre se s'èro recampado…?
***
Arriva sus lou port, coumo tóuti lei matin, es arrapa pèr un coulègo.
-Sabes la novo ? Belugo es mouart. Lou vèntre l'a peta. Aièr au sero. An fa veni lou Samu de Touloun, mai èro ja tròu tard. L'avié de tripo de pertout sus lou lié, lei linçòu, lei vano. Uno abouminacien !
-Mai sabiéu pas qu'èro malaut, iéu !
-Bè, avié lei budèu que marchavoun pas bèn dempuei quàuquei mes. Un còup la cagagno, un còup lou cuou tapa. Subretout, avié 'quelo foulié de manja. Manjavo sèmpre que mai. Tóuti lei jou un pau mai. Rèn poudié l'arresta. Lou tambour de Cassis ! E se manjavo pas ce que voulié, gros coumo va voulié, prenié de criso espaventablo. Trantoulavo, escupissié, e si roulavo sus lou sòu coumo s'avié lou mau de la terro.
-E lei dóutour an rèn fa ?
-Nàni, moun bouon, avien jamai vist acò avans l'an passa. N'an parla dins Var-Matin lou mes passa. Es uno pudemié. Subran, de pertout dins lou mounde, l'a de gènt qu'an creba d'acò. Li dien la malautié dóu manja. S'atrovo pulèu dins lei païs riche, parèisse, mai n'a de pertout, mume en Africo, pèr aquéli qu'an lei mejan de manja tant qu'acò. L'as pas liegi, tu, aquel article ?
-Noun, mi rapèlli pas.
-Tè, vau croumpa lou journau pèr vèire se n'en parloun. Chau !
-Chau !
D'aquel afaire, si n'en parlo, aquelo matinado, à la banco ! La novo a fa lou tour de la viloto pu vite qu'un còup de mistrau. Lou moustre dóu Gros Cervèu, sèmblo que l'an bèn vite óublida, à l'agènci.
A miejou, Pèire à soun oustau mete la telè. Si parlo justamen de la mouart d'aquéu Belugo, un pouliticaire, e d'aquesto pudemié d'aqui. Ansin, Pèire aprèn que l'an remarcado pèr lou proumié còup quienze mes avans, e qu'aro coumençoun de coumprene un pau de que viro. Lei saberu an óusserva lei malaut. La malautié toco quasimen que de gènt qu'an l'abitudo de manja mai de douge milo calourìo pèr jou, e magimen de bevèndo de lùssi. An remarca tambèn que lou caviar, lou fùgi gras, e lou saumoun fuma, à mai de cinq còup la semano, o mai de cinq cènt gramo la semano, sembloun favourisa la malautié. Mai an pancaro pouscu n'en determina lou founciounamen. Saupre s'es un virus ? Tout d'uno, lei gènt si mètoun à veni de gros galavard, mai toujou de manja requist.
Urousamen, que dis lou journalisto, imaginas qu'arribe ei manjaire de faiòu o de rutabaga. A la perfin lou bedelet espeto coumo uno figo pecouleto. Gié de remèdi. L'an que vèn, an previst mai de milo mouart, rèn qu'en Franço. En Africo, saboun pas, mai lou journalisto n'en parlo mume pas. Pèire s'en fa la remarco soulet. La Coustiero d'Azur, e mai que tout Lou Mounegue, Niço e Sant Troupés, quàuqueis arroundimen de Paris, au pounènt, Deauville, La Baule e Biarritz sèmblo d'èstre leis endré lei mai ataca. Lei grand proufessour coumprènoun gaire perqué. Lou Proufessour Lasource, especialisto de digeroumatico trigoussico, declaro que coumo tout lou mounde manjo de caviar au desjuna, ce qu'es esta demoustra pèr d'enquisto facho dins lei labouratòri dóu CRSSS de Mountpelié, acò s'esplico pas. Prepauso que lei gènt manjoun tóuti enca mai de caviar pèr si acoustuma, e jouèine, coumo un vacin, ce que fa mens mau au cuou qu'uno picuro.
Fòu dire qu'a fa, l'ome, uno tèsi mounumentalo, coumo si dis, sus "lou proublèmo de la doulour degudo ei picuro dins lou quart superiour dre de la gauto dóu cuou gaucho pèr gari lei drechié que si trigoussoun quouro digerissoun". Un gros especialisto. Un autre saberu, dis lou journalisto, a prepausa de faire fa sant-miquèu ei malaut pèr vèire se li farié de bèn, e dounco s'es pas leis endré que lei rèndoun malaut. Eric Jourdain, que li dien. Enfin, lei cercaire cercoun, e feniran pèr trouva, coumo va dis pèr acaba lou Menistre de la Santa, qu'a deblouca 281, 5 milien qu'a pas pèr ajuda à la recerco sus la malautié dóu manja. Lou gouvèr sarié mume lèst à ourganisa de sesiho d'ensignamen sus l'orro malautié dins leis escolo.
Pèire n'es estoumaga. N'en fara pas soun penequet. Passara pulèu à l'oustau de la grand, que li gardo sei pichoun. Deman, veira Naïs.
***
Pèire es lou secretàri de l'assouciacien dei targaire de Sanàri. Li es esta marca à dès an, pèr fa partido de la chuermo dei pichoun targaire. Es éu que va vouguè. En venènt ome, avié leissa toumba tout acò. Es pas que li agradavo plus, mancavo jamai uno targo sus lou port, mai avié trouva de cauvo mai interessanto pèr faire. A dès-e-vuech an… Partié sus la plajo emé sei coulègo pèr aluca lei fiho. Assajavoun de caligna lei pu poulido.
Après quàuquei tèms de maridàgi, èro revengu à sa passien founso. Targavo pu gaire, mai s'óucupavo de l'ourganisacien. Si bouleguè pèr que lei "Targaire de Sanàri" siguèssoun counvida óuficialamen ei manifestacien de la Coumuno. Venguè mume proun coulègo emé lou counseié municipau à la culturo pèr óuteni un pau de sòu. Dempuei tres an que lou municipe avié fia ei Targaire l'ourganisacien de la Fèsto dei Pescaire, n'avien fa un bèu festenau. Avié degu un pau bataia que proun targaire targavoun pèr s'amusa, sènso n'en regarda leis aspèt mai founs. Vesien pas perqué la targo aurié de raport em'un festenau que li aurié de "fóuclore", valènt-à-dire pèr élei de vièiei cauvo passado de vogo. Pèire avié un jou fa un dicho qu'es restado famouso. Li avié mes "L'inteligènci dóu fóuclore". E venié coumo acò :
"Si dis que se leis ome si fan tant de mau es souvènt perqué si counouèissoun mau. Que fòu respeta lou "Dre à la diferènci" e si rescountra pèr s'estima. Que lou mesprés deis àutrei es l'ignourènço e la pòu.
Lou fóuclore s'endevèn puei quaucarrèn d'utile pèr l'amista dei pople : lei danso, cant e musico de l'art poupulàri e tradiciounau dei pople soun la provo que de pertout sus la boulo dóu mounde, negre, jaune, blanc, rouge, ome e fremo saboun faire de bèuta. Bèuta dei coustume, dei mouvamen, dei musico e dei ritme, dei fiho e dei jouvènt, dei sourrire e de l'estrambord de la vido. Deis esfouars dóu cors e de l'amo. Quouro badas ei danso, amiras lou pople e sei tradicien. Sias lèst à leis ama. Ce que vous empacho pas de denouncia lei barbarié qu'eisistoun de pertout.
Ce que fai de mau es d'anequeli la diverseta dei tradicien, lueogo de li trouva lei gàubi, leis estrambord, lei forço e leis entr'ajudo necito au mounde. La sourso de fouaço mau, la fòu guigna au det : es lou centralisme, qu'a rèn coumpres au mounde e qu'es en trin de tout tuia.
Urousamen, li tradicien poupulàri regiounalo soun encaro vivo. Avèn de que reparti. Basto que cadun siegue fouart de soun identita istourico, prefoundo -la lengo n'es un pieloun-, que resiste ei mussonjo centralisto, sènso óublida que la diferènci es la coundicien proumiero de la duberturo eis àutrei." D'aqui, tóuti l'encarguèroun dóu festenau.
Tant talamen que si n'èro bèn carga, que Pèire Pradet si retrouvè secretàri generau dei Targaire, valènt-à-dire lou patroun vertadié de l'assouciacien.
Banquié, n'en survihavo mume lei comte. Mai lei ten pas. De còup que de lingo de puto…
Lou burèu duou s'acampa èstou dimècre au sero pèr faire lou poun sus lei acien passado em'avenidouiro.
***
La mouart de Belugo a fa naseja dous o tres journalisto dei journau regiounau e de FR3. Soun vengu s'entreva dei ressouon de la mouart d'aquel elegi e de sa malautié. De fes que trouvarien un bouon sujèt pèr manda eis atualita naciounalo. De bèn rescountra, li farié un gros renoum dins lou mestié. Mai an principalamen pèr messien, ordre dóu patroun, de mena lou trin pèr que si parle de Belugo mume après sa despartido. E bèn segu, de pas n'en dire de marrìdei resoun. Acò si fa pas entre gènt dóu mounde. Ato puei, tóuti lei pouliticaire questiouna n'en dien aro de bèn, e n'en proufitoun pèr si moustra bèn poulit e bèn brave.
Sus lou port, davans lou municipe, au marcat, arrèstoun lei gènt pèr li demanda de parla de Belugo. Parlas bèn dins lou micrò. Regardés pas pas la camera. Vo, regardas-mi pulèu. Mai de Belugo e de sa malautié, tout lou mounde s'en foute. Mume emé la proumesso de passa à la telè, degun a rèn d'interessant à dire, ce qu'es pas grèu, basto de lei moustra e gardant quatre cinq mot descoupa, mai subretout rèn à dire, e pas mai ! Es uno cauvo, pecaire, que lei journalisto pouadoun pas dire. Se laissoun l'avis dei gènt s'istala dins lei media, mounte anan ?
N'en soun aqui quouro Pèire passo sus lou port, matinié, s'entournant de l'escolo que li a mena sei pichoun pèr lou darrié còup aquest an. Just en fàci dóu cafè de la Marino. va pèr s'arresta à la librarié croumpa de papié. Li tres de FR3 li bloucoun lou camin, li empegoun un micrò souto lou nas :
-Avès entendu parla de Reinié Belugo ?
-E vo ! Avié la tuoularié sus la routo dóu Bausset.
-Sabès qu'es mouart de la malautié dóu manja ?
-L'an di.
-Que n'en pensas ?
-Rèn.
-Coumo, rèn ? Es un ome pouliti, deputa de l'endré !
-Rèn. Dóumàgi pèr éu e pèr sei gènt, e basto. Lou restant, m'en fóuti. Perqué parlas d'éu e pas de la vièio Marìo, que s'es negado l'a gaire en toumbant dins lou port ?
-Mai Belugo èro un ome impourtant…
-Un bèu marrias, mussoungié qu'a jamai tengu sei proumesso. La vièio Marìo, tout lou mounde l'eimavo bèn, eici. Èro un bèl eisèmple de bouano persouno.
-Mai poudèn pas…
-Que ? Que ? Poudès pas ! Nous venès en òdi emé vouàstei enfourmacien de merdo ! Que n'en sabès de ce que tafuro lou mounde, vautre ?
Pèire dis acò emé lou sourrire, gentamen, l'èr de dous èr. L'autre saup pas coumo faire. Apounde Pèire emé l'uei trufarèu :
-Cresès de parla dei cauvo essencialo, dóu mounde grandas, que toco fouaço gènt. Vé, vous troumpas coumpletamen. Ce qu'es essenciau es pas vouaste pichoun mounde de tèsto courounado. Es pas ce que si debano talamen luen que rèsto en idèio. Es ce que cadun viéu tóuti lei jou, au pròchi. Quouro aurés encapa que se cadun si mete d'à founs dins sa vido particuliero, à oubra emé lei gènt que li soun à l'entour, l'ensèmble anara miés… Restarés puei de fugi à contro-sèn sus la marrido draio, aquelo que li pensas qu'au mai alargas lei cauvo, au mai lei gènt si soucitoun deis àutrei. Es tout lou countràri. A forço de li counfourma souto aquéu moudèle dóu gigantas, luego de lei buta à s'enfourma veraiamen sus soun quoutidian, li counvinquès que tout acò lei passo d'aut, qu'éli li pouadoun rèn, qu'an plus que de subi, e de s'encoucouna pèr subre-viéure en gousto-soulet. Vaqui perqué sarié bèn mai impourtant eici de s'inquieta de la despartido d'uno vièio de l'endré que de la reacien dei deputa de Paris o de Pamparigousto-leis-óuliveto sus la malautié d'un catau. Em'acò, pas mai ! La vido veraio dei gènt, es pas coumo dins lei burèu dei redacien parisenco, sabès, sourtès un pau de vouàstei niéu, vous fara de bèn !
E lei planto aqui sus lou troutouar.
A nòuv ouro dóu sero, lou burèu de l'assouciacien s'acampo. Dins uno salo prestado pèr lou municipe, au Cèntre culturau avengudo Leclerc. Pèire a previst de demanda d'en proumié l'acouàrdi dóu burèu pèr passa un article sus l'afaire dóu Gros Cervèu dins lou "buletin dei Targaire". Acò va pas soulet. Uno bello mita dóu burèu refuso de crèire que l'ague que que siegue de verai dins l'afaire se l'an pas vist de seis uei. Voualoun pas prene lou risco de fa passa l'assouciacien pèr uno bèndo de fadòli. Leis àutrei dien que toumbo aqui l'escasènço de traire lei regard vers de cauvo que si n'en parlo pas dins lei media, e dounco de prouva l'utileta d'uno vido culturalo loucalo. Coumo soun tóuti ensèn dins l'idèio de l'utileta loucalo de soun buletin, fan pache que Pèire escriéura un editouriau aqui subre, e que pourra n'en proufita pèr menciouna l'afaire.
Vèn puei un proublèmo de dre de respouonso. Uno revisto mita universitàri mita militanto, que li dien lei "Dossiers dialectiques de l'héritage régional", a parla dóu festenau pèr n'en dire de mau. Pèire a l'idèio de boulega :
-Poudèn pas leissa 'quélei moussurot nous escupi darrié sènso rèn faire. Lei gènt van si pensa qu'avèn pas lou fùgi de rebeca, o pu piègi, que recounouissèn nouasto fauto. L'a de mounde que liege aquelo revisto de nàni, e mai que tout dins lei mitan pounchu. Nous van fa passa pèr de couioun, e poudren pu jamai si faire escouta. Lei pouliticaire escoutoun mai voulountié lei saberu que lei bràvei gènt ! Raport à 'cò, crèsi que duvèn li manda un dre de respouonso.
-V'an fa à bèl-esprèssi pèr nous faire caga, va sabes, que, Pèire ! li fa Tòni lou clavaire. Se li mandan ta reguignado, saran countènt, auran capita. E puei qu soun ? Quant soun ? Quàuqueis envejous despacienta que voualoun fa parla d'élei. Uno pougnado d'inteleituau adamiseli. Nautre avèn l'asseguranço dóu soustèn dei gènt. Es pas le peno de degaia de tèms emé de quècou.
-Crèsi iéu que soun bèn mai dangeirous qu'acò. An de poudé. E d'abord qu'an la paraulo, an lou poudé dei mot. Dei mot escri. Aquélei que rèstoun. Lei mot fan fouaço mau, sas, e mume lou mot "chin" mouarde. Siéu pas la meno de tipe de mi brussa pèr de couiounado e de tout espóuti. Mai l'a de moumen que fòu si despensa pèr faire respeta de princìpi de founs.
-Bouon. Voutan ?
-Vouei.
Lou poun de visto de Pèire passo. Es vounge ouro. S'en van cadun au siéu. La nue es lourdo e sènte lou mouisse. Es tròu tard pèr souna Naïs.