óuriginoV
L'article de Jan es dins Le Provençal-Dimanche.
Lou cap-redatour n'a bèn vougu, mai pèr leis amusèti dimenchau, la leituro radassiero, lei jue, lei prougramo telè, pèr lou mens serious que l'atualita journaliero. Pèr Jan, es qu'uno mié-vitòri, mai li cresié gaire. Pèr Pèire, es adeja pas mau.
Un Monstre à Sanary ?
Lou tèste a vira à l'istòri pivelanto, pèr fa pita lou mounde, mai sènso tròu cabussa dins lei couiounado fantasmagourico. Ni Pèire nimai éu voulien que lei gènt saussèssoun dins lou niais. Foulié pas espaventa, foulié pas nimai fa s'estrassa dóu rire.
E d'efèt, l'aura gié de letro pèr n'en parla dins lou courrié dei leitour, coumo 'cò s'encapo quouro lou sujèt facho Pau e encanto Jaque. Pèr dire lou verai, l'aura gié de reacien. Pas gié. Tout lou mounde s'en foute. Au bout de quienze jou, Pèire sounara Jan, pèr rena e si lagna, s'encagna contro lou mounde. E Jan li vendra coumo 'cò :
-Favouio, qu'esperaves ? Se degun s'es trufa de nautre, es adeja pas mau !
-Mai perqué ?
-Perqué que ?
-Perqué degun s'interèsso à 'cò ?
-Qu ti v'a di, que degun si l'interèsso ?
-E bè tu, tè, gié de letro, gié de represo dins la prèisso…
-Gié d'article, acò m'estouno pas. Mai gié de letro vòu assouludamen rèn dire. Proumié, tout lou mounde liegisse pas lou journau, e surtout lou diminche ; e demié lei que lou liegissoun, quant n'a qu'aujaran escriéure ? Quant n'a que crèsoun que soun vejaire es impourtant, o mume qu'a la mèndro valour publico ?
-…
-E vaqui. Es aqui que lei galino fan d'uou. Alor ti fagues pas de bilo negro ; Quand plòu pas, degouto.
-Mai li avèn fa vèire lou cuou emé de braio novo. Acò, pouàdi pas mi l'empassa.
***
D'aquéu tèms, chascun de soun coustat, prenoun mai l'estevo e obroun ei cauvo que lei pensoun bouano.
A Sanàri, de figo d'un autro banasto óucupoun leis esperit. Leis eleicien de la prudoumié dei patroun-pescaire aprochoun. D'ourdinàri, si fan avans la Sant Piarre, à la fin de jun, qu'es la fèsto dei pescadou. Mai aquest an, pèr encauso d'uno grèvo dei pescaire de la coustiero dóu relarg, an pas pouscu alesti lei vote e la fèsto s'es facho emé lei prudome dóu còup d'avans. Es lou vièi Felipe, d'aiours, estènt prudome d'ounour, que li representavo. Es lou darrié qu'aceto de carga lou vièsti tradiciounau dei prudome-pescaire : uno meno de raubo d'avoucat, un pau coumo leis estudiant anglés o american, em'un capèu redoun e naut, aplati sus lou subre.
An puei pres seis amiro pèr fa leis eleicien à la debuto de setèmbre. Mai emé la grèvo de jun, figuro-ti que la carrello es mau vounchudo. Lei garrouio si soun pas tuiado. L'a d'un coustat quàuquei famiho de Sanàri, coumo leis Amourètti, lei Castan, lei Pignoun, que voualoun fa restanco ei gros pescaire pèr pas si faire esquicha. Alor en jun, d'acouàrdi 'mé d'àutrei pichoun pescaire dei vilo dóu relarg, an empacha lei gros batèu de sourti o de rintra dins lei port de touto uno semano. Dien que lei gros pescaire, emé sei gros batèu, sei grands arret e tóuti sei sòu, s'estèndoun mai que mai sus lei marcat, rabaioun tóuti lei pèi, e li laissoun pu rèn de rèn pèr pousqué derraba sa vidasso.
Lei gros pescaire, es tout de fourestié. De Pèd-negre, pèr la majo part, mai tambèn à Sanàri un Bretoun e de Franchimand. Lei Pèd-negre, arriva à la debuto deis anado sieissanto, emé sei sòu amoulouna ei coulounìo, e lei bouon presta que lei banco li fèroun -la pèiro toumbo toujou au clapié- s'inquietoun gaire dei pichoun pescaire de l'endré. Lou Bretoun e lei Franchimand travaioun pèr uno soucieta nourmando qu'a mounta de coumtadou un pau d'en pertout.
Au mitan, as de pescaire, Prouvençau o noun, que cercoun de carma l'estampèu e d'assaja de trouva un biais de fa viéure tout lou mounde ensèmble. Aqui troves lou vièi Felipe.
En mai d'acò, lou chantié navau marcho mau, emai seis ativeta siegoun limitado ei raparacien dei batèu. Lei gros chantié de La Sèino e de La Ciéutat cabussoun. Alor lei prouprietàri dei gros batèu de plesi s'en van en Itàli o à l'Uba pèr lei faire entreteni, à luego de lei douna ei pichoun chantié de l'endré mounte rèstoun la mita de l'an. Es pas bouon pèr lou travai. Qu pinto vènde.
Dóu còup, d'ùnei Prouvençau fan remarco que lou païs s'atrovo encuei rèn que souto la barreto dóu tourisme, ce qu'es uno poulitico ecounoumico dangeiroua, e pèr dire soun verai, suicidàri. Lei countèsto an dounco ja remounta au municipe, que si defènde en diant dins soun buletin municipau que l'a tambèn d'endustrìo dins lou ròdou. E que la regioun es luen d'èstre souto-desvouloupado dóu poun de visto teinoulougi. Ce que tout lou mounde aceto, en rebecant pamens, coumo l'a di Castan, que lou tourisme manjo tout, e mume l'èime dóu païs.
Vaqui puei un acamp generau dei pescaire de Sanàri. Dins la salo municipalo de l'avengudo Leclerc. Cade "partit" li presènto sei pousicien. Mètoun la man à la saco, e toumbo que lei gros parloun proumié. Lou parlaire es un Pèd-negre d'uno cinquanteno d'anado, un pau raplot, emé lei chivu blanquejant sus lei coustat e lou su lisc coumo uno bocho de petanco. A l'uei risèire, la "chacho" simpatico. Fa un pau lou quèquou. Esplico que l'a gié d'autre mejan de subreviéure que de si moudernisa e de si douna la man. Pèr éu, lei pichoun que refusoun l'inevitable es de couièti que passaran lèu pèr maio. Fòu pulèu restanca leis Italian e leis Aràbi pèr sauva la pesco franceso. Vaqui lou nemi, que vous diéu iéu, vous troumpés pas de toco !
Aclama pèr sei coulègo, felicita pèr dous o tres representant dei gros sendicat parisen, respouonde puei ei questien d'un journalisto de Var-Matin. Lou Cònsou-ajoun li fa un signe de soustèn, e la sesiho repren. La salo es gaire grando. Lei cinquanto persouno l'an cafido. Fa caud, e lou fum dei cigaleto tèisse 'no nèblo espesso. Cinq ouro de l'après-dina, estòri tira e fenèstro duberto. Atmousfèro tèbi e fatiganto. Grèvo.
Vèn lou tour d'Amourètti de teni lou le. Es un ome dins lei quaranto an, basti soulide, la caro intranto. Soun paire e soun grand fahien ja pescaire à Sanàri. Sa famiho viéu dei sardigno despuei de generacien. Si drèisso darrié la taulo pèr parla. Aluco lou mounde. An renja lei taulo en trianglo. D'asseta, l'a sus cade coustat lei rèire-prudome e lei nouvèu candidat. Un partit pèr coustat. Au mitan, à la tiero de taulo que formoun la bàsi dóu trianglo, as lou presidènt, lou secretàri de sesiho, lou prudome d'ounour, e dins lou cantoun lou candidat de l'idèio d'arrenja lei cauvo. Darrié chasque coustat, viès lei que dounoun soun soustèn, asseta o de dre, au founs.
Amourètti coumènço de parla. Un gros silènci aclapo tout. Sa vouas. Parlo francés emé lou biais prouvençau. Viéu, calourous e serious. Tóuti l'escoutoun. Un pau esmarra au mitan d'aquéu mounde mieterran que gaubejo la paraulo, lou Bretoun isto mut, mume au moumen dei questien. Amourètti parlo, éu, de sauva un biais de viéure umanisto qu'es utile d'en pertout. E dounco la Prouvènço contro lei gros vengu d'en defouaro, qu'an pèr soucit que lei sòu, e qu'esquintoun lou mounde. Si mouastro un pau despichous en regardant leis "estrangié" que respètoun pas leis usàgi, pescoun 'mé de gros batèu, d'arret que la coustumo lei vòu pas, e qu'an pèr dessus lou marcat lou culot d'acusa leis Italian o leis Aràbi, que n'en vian jamai pusca pèr aqui. Sian mèstre au nouastre, e se voulèn pas faire coumo aiours, avèn lou dre, que dis pèr clava, en prouvençau.
Picamen de man. Lou journalisto si despacho de vira la fueio de soun casernet pèr nouta lei darrié mot, e s'aviso que saup pas escriéure lou patouas. Lou Cònsou-ajoun guincho vers Amourètti. Lei sendicalisto saboun pu que faire : gié de mejan de telefouna au coumitat centrau pèr saupre soun avis aqui subre. Aquelo meno de crido intro pas dins sa ligno e sei prepaus. V'avien pas previst. V'avien pas pas màncou pensa. Chifroun un moumenet, e decidoun de prene un èr de dous èr.
La bilo bouie un pau.
Es acò que si penso Felipe au moumen de parla. Decan e prudome d'ounour, fa figuro de sàgi. Si drèisso. Tóuti si taisoun. Tussisse un còup, e devisto l'assemblado.
Meis ami, mei coulègo, mei counfraire, pèr iéu es tout parié. Vous vau counta lei garrouio qu'avian à passatèms, entre pescaire de Sanàri. Nous poudra sarvi de leiçoun.
Antan, l'avié trei quartié de pescaire. Dóu coustat deis alèio e de l'avengudo Jan Jaurés, l'avié lei levantés. A l'autre bout de la vilo, mounte avèn aro lou quèi Esmenard, l'avié lei pounentés. E au mitan, devers lou municipe, lei pescaire dóu mitan ! Lei pounentés e lei levantés si poudien pas soufri. Si fahien de guerro. Lei bèndo de móussi, s'un còup si recountravoun, si batien coumo de chin fada. De luen, si jitavoun de pèiro. Si fahien la loubo. Si jitavoun lou marrit sort. Lei ome, e lei frumo peréu, si frequentavoun gaire. De còup que l'a, mume, si levavoun lou bounjou. Leis empachavo pas de si presta la man se va foulié, coumo pèr eisèmple s'un pescaire si faié aganta pèr un còup de largado, mai enfin, s'eimavoun gaire. Maginas-vous que pèr elegi lei prudome, èro un istòri dóu tron de Diéu. Es lei pescaire dóu mitan que faien la balanço. Urousamen qu'èroun 'qui, que senoun rèn aurié pouscu si faire. E la prudoumié aurié fa lei badai.
A l'epoco, èri dóu mitan, iéu, e va siéu encaro. Sabès mounte rèsti. Acò vòu pas dire que siéu dei sènso-vejaire que toumboun d'acouàrdi emé tout lou mounde o emé lou darrié qu'a barjaca, o mume que si foutoun de tout. Ai de princìpi de vido. E mi li tèni. Refùsi la coumproumessien. Degun m'a jamai croumpa. Mai crèsi, tant qu'es poussible, que de si parla empacho de s'encagna e de s'embarra dins de pousicien eisagerado, e que fan restanco au bouon sèn. Alor vaqui moun avis.
Vàutrei lei gros pescaire, avès resoun. E avès tort. Avès resoun de dire que fòu pas si rintra dins soun cruvèu e si crèire qu'es poussible de subreviéure sènso s'óucupa de ce que si passo aiours. Sian dins un tèms qu'acò's pu gaire pensable. Fòu aceta lou prougrès e si n'en sarvi. Mai avès tort de lou leissa vous mestreja à luego de lou mestreja. Avès pas d'autro valour aqui darrié que la vido dóu jou que passo e dei sòu, e dóu gasan. Coumprenès pas l'estacamen deis ome à soun endré. E mume lei Pèd-negre, sias de Franchimand. Pensas parisen. Poudès pas vous refigura que Francés o Italian, eicito, acò vòu rèn dire. L'a de Prouvençau, de Marsihés, de Ginouvés, de Còrsou, de Napouletan, de Catalan, de Sàrdou. Es pas la pesco que duvèn sauva, es lei pescaire. E nautre, aqui, nous gèino pas d'èstre coulègo emé "d'Italian" pèr si facha contro lei Franchimand e leis àutreis esquimò.
Vàutrei lei pichoun pescaire, tout parié. Avès resoun d'èstre despacienta davans uno capitalo luenchenco, e va fòu bèn dire proun estrangiero, que si sarve de l'ecounoumìo pèr vous aplati em'un roulèu. Davans uno lèi que, dins soun encastre, poudès que vous renega o creba de fam, que chausi la mouart de l'amo o la mouart dóu cors. Mai à luego de lucha contro lei counfraire que vènoun travaia au nouastre, tant qu'es poussible, assajas pulèu de lei counverti à vouastei metodo, à vouaste gàubi.
Rèn de pu piègi que l'ignourènço.
Acò di, s'asseto mai. Se regardoun tóuti qu a la plus grosso tèsto…
Lou journalisto espèro de vèire. Lou Cònsou-ajoun a un rendès-vous. S'en vai, sachènt leis idèio de cadun.
L'a puei uno periodo que si vuèido lei lagno. Leis acusacien. Mai l'èr es mens aspre, pego mens à la bouco. Es esta refresca. Sènte l'après-chavano, lou fres e l'ime de la terro, la calamo de l'estòbi. Pèr còup, soun tóuti pas luen de s'esbramassa. Mai va fan jamai. Dins l'emoucien e la calour, quàuquei fraso de prouvençau escapoun entre pescaire de l'endré. Leis estrangié va coumprènoun pas. Si sentoun d'escorno. Quàuquei jouèine li rebècoun qu'an que d'aprene la lingo de l'endré. Leis àutrei rigoloun dóu patouas. Soun à dous det de s'empega de bacèu. Mai l'escaufèstre s'amaiso. La resoun repren. Cadun fenisse pèr recounouisse sei fauto.
La sesiho s'acabo. Clemènte Jouve a pouscu presenta soun prougramo. Es mai que l'ouro de soupa. N'a proun d'èstre embarra dins aquesto salo. Estoufo. Cadun enrego lou camin de soun oustau.
Dins lei carriero, de tras lei fenèstro duberto, s'auvisse lei brut dei fourqueto dins lei sieto, lei pichoun que lalejoun, lei parènt que blagoun, lou presentatour deis enformacien à la telè. Es lou moumen de la calamo dóu sero. Lei carriero soun vueido. Lei gènt soun dedins, e lou ressouon de sei vido s'espandisse. Pauvo d'avans l'enavans de la nue, que lou mounde sara mai defouaro, espés e bramaire. D'óudour de pebroun, de safran, de poumo d'amour e de cèbo fregido courroun jusco lei narro de Pèire. Fa bouon. Lou soulèu baisso, e lou lume dous e rous e calourous alongo lei double sus lei faciado. Leis formo dei platano e dei paumié, sèmblo que voualoun recurbi la terro entiero.
Auro tèndro.
Bèu moumen de pas. Pèire aleno un gros còup, en plen soulèu, e rintro puei au siéu en si proumetènt de jamai perdre l'espèr.