óuriginoVI
L'endeman, dóu tèms que si doucho e que si raso, Pèire escouto la radio. Dounoun lou buletin dei novo quàsi tóuti lei miechouro. Parloun tournamai de la malautié dóu manja. Parèisse que d'àutrei cas si soun vist dins lei jou d'avans, ei mùmeis endré, e tambèn eis Ilo Hawai, en Souïsso, en Califournìo. Un proufessour esplico ce que fòu faire pèr verifica se quaucun a 'ganta 'quelo malautié : li fòu metre souto lou nas un bouon plat de famiho, uno especialita dóu terraire, uno soupo regiounalo, acò, pecaire, lei fa quila coumo de rato- penado. Va pouadoun pas soufri, aquéu manja. Li fòu de cauvo pateto, de besuquet, coumo si n'en pren dins lei saloun parisen. Tant, se l'esperiènci a marcha, pèr lei carma, li fòu liegi de libre en acourdanço emé sa manjaio (lou darrié Goncourt vai bèn), o li juga un pau de musico classico, o bèn li moustra de tablèu famous (d'avans lou siècle dès-e-nòu s'es poussible, e surtout gié de travai d'amatour !). Après, plan-plan, venien anuï, entussi, atéuni, nequeri, amourti, amudi, amoussi, mousi, deglesi, e manjavoun de ris.
Que misèro !
Pèire cambio de radio. Quito RMC pèr passa sus Radio-Franço-Prouvènço. Aqui, parloun dei cas de la malautié dins la regioun. Pèire n'a soun proun. Passo sus uno radio libro, coumo dien puei, que si capito pèr lou verai èstre uno radio parisenco trasmesso pèr satelito. De fiho de la vouas putassiero li murmuroun tout d'uno que s'atrovo sus M. O. Q. FM, e que vaqui lei novo. Un ome censamen jouèine e countènt vèn parla deis auvàri de Lasserre, lou famous restaurant parisen, e de Maxim's. Emé la mumo vouas, lei mùmeis intounacien couiouno e lei mùmeis espressien que tóuti sei counfraire. Pèire pauvo soun rasouar, e s'afisco à si trouva uno radio vertadieramen loucalo. Toumbo sus Radio La Sèino. La counouisse, e franc d'uno emessien dóu diminche qu'es facho cade còup dins un endré diferènt, pèr rescountra lou mounde, parloun tóuti pounchu, passoun lei mùmei dìscou que de pertout, e jamai de la vido dei gàrri parloun prouvençau. Aquélei pipi, l'aurié fa vergougno de leissa 'scapa soun acènt miejournau. Avien paga de sa pòchi de cous de prounounciacien pèr faire parlaire de radio. Pèire countùnio. Encapo uno radio de La Ciéutat, mountado pèr lei sendicat dei Chantié emé l'ajudo de quàuqueis elegi de gaucho, pèr fa passa lei revendicacien. An de prougramo un pau mens couioun que lou restant, e cercoun de viéure au païs, de fa viéure lou païs. Es la souleto radio prouvençalo dóu relarg. E si li entènde la lingo de tèms en tèms.
Aqui, charroun pas de la malautié à la modo. Passoun uno entrevisto d'un pichoun pescaire dóu port dei Lèco que ramento à Pèire l'acampado de la vèio. Éu peréu, dis, a pòu de pu pousqué derraba sa pauro vidasso. A la fin, lou parlaire anóuncio uno countèsto lou sero sus la radio, entre lou sendicat deis oubrié-pescaire e lou deputa respounsable de l'ecounoumìo au Counsèu generau. E zóu de musico.
Pèire a feni sa teleto. S'en vai desjuna sus la logia, en braieto e pitre nus. Deman, dissate, passara la journado emé Naïs. Fan !
***
A nòuv ouro, Pèire parquejo à la Croix du Sud. Pico à la pouarto. Naïs douarbe. Sourrire. Fai aro un mes que si frequèntoun. Poutoun. Quichamen dei man, dei bouco, dei cors. La boulo dóu mounde rèsto de vira. Fa pu ni caud ni fre. An passa dins l'autre mounde, aquéu dóu bouonur, de l'amour, dóu plenun. Soun plus 'qui. Vivoun d'élei.
Au mai si trèvoun, au mai s'aimoun, e de pas si vèire tóuti lei jou, li crèbo lou couar en mume tèms que li mete de pichoun còup de pouncho d'amour.
Revènoun un pauquet. Gaire. Lei pèd aqui, mai la tèsto aiours. An decida d'ana passa la journado eis Embiés. D'un còup de vouaturo, lei vaqui au Brusc, e sus lou Super-Coucoussa, que fa dempuei trento an la mumo travessado sàbi pas quant de fes pèr jou. S'assetoun sus lou banc. En brasseto. Gauto contro gauto, e regardoun lou rebat dóu soulèu sus la mar. De la pouncho deis det au bout dei chivu, soun bèn.
Tèms en tèms sei regard si prenoun, e si dien tant d'intenseta, tant d'emoucien, e tant de tant, que pouadoun pas si sourrire d'un moumenet. Aqui, tout lou mounde vis quant s'aimoun, e n'en sàbi d'espanta de descurbi quoucarrèn d'autant bèu e d'autant fouart. Souspir d'emoucien. De tant de sentimen, de fes, talamen n'en siés gounfle que souspires d'un bouon gros souspir de joio.
Alor sourrire, poutoun, e mai la mar.
Soun arriva en mens de quienze de menuito. Quand parles d'une crousiero !
Sus l'ilo, es uno raisso d'avoust que leis aculisse. S'en foutoun, caminoun, s'eissugant de còup lou nas ounte rajo l'aigo tèbi. A vounge ouro, de raisso en raisso, soun trempe. Aplanta darrié 'no capello, si regaloun de vèire la mar, e quicha l'un contro l'autre, si poutounoun e risoun.
Lou tèms de davala pèr si croumpa un moucèu de que si leva la fam, lou vènt a vira. Lou mèstre de tóuti lei vènt de Prouvènço escoubo lou ciele, restanco lou levant, e lou blu revèn de darrié lei niéu. Decidoun d'ana manja dins un pichoun restaurant sus lou port. Aqui, en fàci, si manjoun deis uei. Paraulo. Si repassoun soun rescontre, sei debuto, sei sentimen, soun bèn-èstre. Pèire parlo de soun maridàgi troumpa. Soun bravamen bèn. Si regaloun d'un gros platèu de couquihàgi, e d'un vèire de bièro fresco.
Partoun de l'aubergo lei darrié, souto lou risoulet amistous de la patrouno. Decidoun de si recampa sus terro, e d'ana fa lou penequet dins uno pinèdo tranquilo. Lou court de la travessado en batèu lei fa mai rigoula. Pèire retrovo sa vouaturo, e zóu, lei vaqui mai sus la routo, en bousco de soulas. S'en van dóu coustat d'enfre-terro, assaja de fugi un pau lei touristo que s'esquichoun sus la coustiero coumo d'anchoio. Gràndei fourèst dóu Var. Vitro duberto em'óudour fouarto. S'en van à l'asard, enregant toujou que mai lei routo lei pu pichouno que si presèntoun. De routo en draio e de draio en draiòu, aplantoun la vouaturo au fin founs d'uno fourèst óublidado. Countùnioun d'à pèd. Mai lei roumias e tóuti leis espino de la garrigo li fan restanco e lei mènoun óublija dins un pichoun endré redoun, a mita bagna de soulèu, souto de roure e quàuquei pin. S'estèndoun sus la maigro bauco e leis espino de pin. Si parloun gaire, mai si regardoun emé tant d'intenseta que mume lei pu bèu dei mot dóu pu grand dei pouèto aurien l'èr niais à coustat. Sei cors s'espousoun, couta sus lou flanc. De poutoun en regard e de regard en caresso, sèntoun mounta pèr lou proumié còup lou desaire. Geina, bessai, temide, segu, un pau esfraia d'èstre defouaro, ruississoun à si countourroula, un còup, doui còup, chasque còup un pau pu tard. Mai lou ciele es de vasteta, lou soulèu de douçour, e l'amour d'en pertout. Aqui s'arrèstoun pu. Fan l'amour douçamen. Tendramen.
E puei van vite s'embarra dins la vouaturo, sènso tròu saupre mounte soun, de que dire, de que faire. Sei man si cercoun, si trovoun, si maridoun. Li fòu un gros moumen pèr reveni sus terro. L'après-miejou a passa, e l'escandihado dóu plen dóu jou calo puei. Decidoun de s'ana bagna dins un endré desert.
Es dificile de lou trouva, mai soun testard aqui subre. Cercoun sèmpre un endré que li parle, que leis ispire, que li toumbe coumo un gant. E lou trovoun sèmpre. Aquèstou còup, es uno pichouno calanco, pròchi La Sèino, au Cau Sicié, darrié la fourèst dóu Janas. A vuech ouro dóu souar, l'a pu degun, e Naïs rintro plan dins la mar. Pèire, éu, a encaro la pèu tròu esmougudo pèr auja assaja la frescour de l'aigo. Espèro Naïs sus un roucas, la regardant neda e sourti de l'erso coumo uno sereno privado. Fòu dire qu'es bello, bello, que la charmo rajo de soun èstre, e qu'èstou sero mai que tout es l'imàgi pinta dóu bouonur.
Revengudo, poutoun bagna de la sau de la mar e de la sau de la vido.
***
A tres ouro de l'après-dina, en pleno calour, mentre que tout lou mounde chaumoun, l'ourlamen de la sirèno dei poumpié estrasso la calamo.
Leis estajan nasejoun ei fenèstro, d'àutrei mourrejoun, lei siestaire toumboun dóu lié, lei bello-maire rèstoun de rena, de chouquet s'arrèstoun, e lei mai curious souartoun pèr carriero. Si vis pas rèn. Mai an la mumo petacho tóuti : lou fue.
L'encèndi de fourèst que, pecaire, tant arribo dins l'encountrado. Mai pèr aro, degun pòu saupre ce que si passo. La caserno dei poumpié es au camin de l'Uido, darrié la viloto, dóu coustat de la mar à respèt de l'autorouto. Es tròu luen pèr que lou ressouon dóu perqué de l'alarmo s'espandisse demié lei gènt.
A l'ouro, Pèire parte à la banco. Sanàri sèmblo un pau ensucado. Lei gènt espèroun lei novo, e souartoun gaire. Quàuquei paquet de gènt que charroun. La plaço Cavet es quàsi vueido. L'atmousfèro pego coumo de melico gastado.
Avengudo Jan Jaurés, au contro, la filo dei vouaturo s'aloungo coumo à l'acoustumado. Lei touristo inchaiènt descèndoun au brounzo-tafanàri. De Bandòu à Sièis-Four, lei plajo s'emplissoun de nené, de cuou 'mé la ficello, de bèuta brunido e de mamet roujasso, de quècou balès e de baudufo de sin, de gros nourden blanc e de furaire vougnu, sènso coumta lei papié sale, lou rap nouio-ourkés, lei chin e lei sourtiduro alergico.
Arrivo à la banco : lei pinèdo dóu Gros Cervèu cremoun. Es bèn un fue de fourèst. Quouro la cauvo es dicho à la banco, souartoun tóuti pèr vèire se l'a de fum. Rèn. Rintroun tourna travaia, gounfle.
Es vers sièis ouro soulamen que lou fum es proun espés e proun gros pèr èstre vist. Alor tóuti lei gènt davaloun pèr carriero e alucoun l'orro provo en coumentant l'evenimen.
Quouro Pèire rintro au siéu, si jito sus la radio e sus la televesien pèr n'en saupre mai. Mai à despart d'uno pichouno fraso eis enformacien regiounalo de FR3 Prouvènço, pas rèn. Em'acò, fai-ti gras !
Pèire decido puei d'ana vèire. Souno Naïs pèr agué de novo de sa journado, e li dire que passara à soun oustau qu'un còup tourna dóu Gros Cervèu.
-Sian mai sus la tintèino, li vèn Pèire.
-Que vòu dire acò ?
-Que lou païs soufro e que duvèn fa nouaste devé. Vau ana vèire ce que si passo au Gros Cervèu, à l'encèndi. Fòu que sàchi se lou mounde pòu douna la man. Poudèn pas leissa creba la terro nouastro sènso mume n'èstre avisa.
-Mai es dangeirous, e…
-T'en fagues pas, ma bello, sarai prudènt. De tout biais, la pouliço e lei poumpié mi leissarien pas m'aproucha.
-Fa bèn atencien à tu, moun àngi. T'espèri.
-A tout aro !"
E sauto dins sa vouaturo.
A luego de prene lou camin de la Devinoto e de passa pèr la Tourrello, Pèire enrego lou camin de la Verneto à l'Ouliveiredo, e toumbo en plen entre lou Lançoun e Bouceno. A suivi la direcien dóu gros fum à visto de nas, e s'es pas troumpa. Lou Gros Cervèu brulo aqui. La pouliço a coupa lei camin que mountoun dins lei coualo : aquéu de la Capello Santo Trinido, aquéu de Santo Trinido, e mume aquéu de Bouano Gràci. Lou prefet a douna de coumandamen que tout siguèsse fa pèr pas barra l'autorouto.
Pèire s'aplanto e parquejo la vouaturo sus lou camin de la Tourrello. Mounto d'à pèd à l'oustaloun de Cabanel, lou vièi pastre. Es aqui, asseta davans la pouarto, leis uei estaca à la coualo e l'èr un pau estabousi.
-Òu ! Bounjou ! li fa Pèire en butant lou pourtissòu dóu jardin.
-Tè ! Siés aqui moun bèu ? Que bouon vènt ?
-E bè, vouliéu saupre un pau ce que si passo. Nautre en vilo sabèn rèn. A pas l'èr tròu grèu ? La pouliço vous fa pas parti ?
-E nàni ! An di que pèr aro, estènt de sero, lou vènt boufo de la mar, pas fouart, e que lou fue pòu pas veni 'qui. Mai deman l'aura un mistralet que mi tiro soucit. E puei l'a d'ouro que cremo, e fan veni que mai de mounde. A pas tròu l'èr de vougué s'amoussa. Sian poulit, que ! Mancarié pu que tout acò brulèsse, e moun oustau tambèn ! Aurai pu rèn.
-Dau ! Vous fagués pas de marrit sang, vai, tant pòu s'arrenja. Empachara pas que la fourèst sara proun esquintado. Mai lei gènt saran sauva.
-Veiren bèn.
Lou pastre a pas l'èr de tròu pita au bounias dei paraulo de Pèire. Pèire li crèi gaire nimai, va dis pèr rassegura lou vièi. Un ànci sourne tapo la gargamello dóu jouèine, e maugrat touto la meioua voulounta dóu mounde, duvié souna coumo uno gamato embrecado.
-E nouasto bestiasso ? demando Pèire.
-Diéu saup ce que va deveni, respouonde lou vièi, em'un gèste soucitous. Trevavo encaro lei coualo aièr. Ai vist sei piado. Mai lou fue, l'ai vist à sa debuto, fai uno barro de trei cènt mètre de larg e de cinquanto metro d'espés. E encaro acò èro au mitan de l'après-dina. Aro, a degu s'enlargi e s'espandi que mai. Deman, nous revendra en pleno gulo emé lou mistrau. Va tout brula. Sautara mume bessai l'autorouto e davalara jusco la vilo.
-E lei camp de tibanèu ?
-An fa parti tout lou mounde de l'autre coustat de l'autorouto. Rèsto pu gaire aqui que lei gènt qu'an seis oustau. Mai nouaste moustre, coumo tóuti lei bèsti, li leissara la pèu, e zóu, passo que t'ai vist, uno bello descuberto de perdudo ! Lou fue, sabes, es uno salouparié que li escapes pas. Urousamen, puei, qu'avèn pas tròu alarga nouasto descuberto, que l'aurié agu de couioun pèr dire qu'es lou diable, e que nous mando sei pougneduro. E d'àutrei couioun pèr dire qu'aquèstou fue, es Diéu que lou traguè pèr purifica la coualo d'aquèstou moustre. E patin coufin… Estou matin, tout èro tranquilas. A tres ouro, lei cigalo calèroun. E pas mai de miechoureto pu tard, lei bèsti foutien lou camp. Es un vesin qu'a entrevist lou fum lou proumié. A souna lei poumpié. An tóuti vengu lèu-lèu. E vaqui. N'en sabes autant coumo iéu.
-E bèn segu, degun saup coumo vai que l'ague lou fue ?
-T'estouno ? Foulié bèn qu'arrivèsse aqui tambèn. L'a d'endré que lou Bouon Diéu li passo que de nue. Sèmblo lou cas pèr lei fourèst de Prouvènço.
Mai Pèire es pas la meno de tipe que s'empasso lou vin emé lou tap.
-Vau vèire la pouliço, dis, bessai que n'en saupren un pau mai. Au revèire. Revendrai. E se vous couchoun, sabès que poudès resta au miéu. Tenès-vous gaiard, que ?
Acò di, descènde vers l'autorouto e s'aprocho dei posto de pouliço. Lou Cònsou es vengu. Pèire lou saludo e vèn li parla. Un óuficié de pouliço em'un respounsable dei poumpié vènoun justamen baia d'esplico au Cònsou. Lou fue fa camin dóu coustat que l'a degun, pèr darrié la mountagno. Pòu pas remounta pèr encauso de l'auro de mar. Mai poudèn pas lou restanca. La garrigo es fouaço espesso e fouaço cremadisso. Lou terren es puei fouaço coumplica, emé de valoun e de roucas d'en pertout. Lei camioun pouadoun pas escala jusco lou fue. La routo d'Ouliéulo que mounto à la pouncho passo pas proun pròchi lou fue. Faudrié demanda lei canadèr. La nue va lèu toumba.
Pèire aluco sa mouastro. Es quàsi vuech ouro. Fara nue negro vers dès ouro. Fòu que souàni Naïs o que li vàgui lèu pèr pas que s'inquiète. Lou Cònsou si reviro vers Pèire :
-Pèr aro, moun ami, crèsi que vau miés leissa oubra lei gènt de mestié. Mai se deman li fa besoun, veiren coumo ourganisa l'ajudo de la poupulacien. Vous remarciéu d'èstre vengu. Aro, farias miés de vous recampa au vouastre.
A-n-aquèstou moumen, peto un còup de pistoulet. Pèire e lou Cònsou rèstoun atupi quàuquei segoundo, dóu tèms que la pouliço si precipitoun vers l'endré que lou brut n'en venguè. Pèire e soun Cònsou lei suivoun. A trei cènt mètre adaut, un poulicié, souret, gulo ei gènt de s'ecarta. Tèn un ome emé de menoto pèr la man gaucho, e lou pistoulet en l'èr dins la man drecho. Sei counfraire li dounoun aro la man.
Lei gènt an fa arrié. Lou poulicié raconto en sei counfraire. Un païsan de l'endré a trouva l'ome e l'a dessuito regarda coumo aquéu qu'a bouto fue à la coualo. A chama sei vesin, e voualoun tóuti si revenja. Urousamen pèr lou tipe menouta, passavo 'qui, pèr coumta lei gènt, e l'avié vist.
Un estampèu espeto puei. Lei gènt de l'endré, mita fouale de coulèro e desmasia de la pòu, eisijoun soun revenge. La pouliço lei vòu embandi, e li creido de rintra au siéu, qu'es aro l'afaire de la pouliço, que sian dins un païs civilisa, qu'avèn uno justiço, e que sian panca segu qu'aquelo ome es fautible.
Lou païsan qu'a destousca soun coupable si mete davans :
-Es éu. Es un fada. L'ai souspres en trin de si sega, escusas lou mot, en regardant lou fue. A d'alumeto dins sa pòchi, e uno branco de pin pèr faire un atubau.
-Qu'es aquel ome ? De mounte souarte ? Lou counouissèn pas ! Coupen-li lou vié ! creido un autre. E mant un fan vo.
-Es pas 'no provo, acò, li rebèco un ispeitour. L'avès vist bouta lou fue ?
-Nàni ! Enfin…
-Nàni !!! E lou voulès chapla en moussèu !? Qunto justiço ! En dequé serto la lèi, alor ? Lei tribunau ? An ! Arrestas vouàstei cagado !
-E merdo ! lou païsan fai. Viro lou cuou. Lei poulicié mènoun lou souspèt ei vouaturo e fan parti lei coulerous.
-Li cresès, vous ? Pèire demando au Mèro.
-M'estounarié. Mume momò, un bouto-fue garço lou camp pèr pas si faire aganta. Aquel ome a degu passa pèr aqui, vèire lou fue, e travaia dóu capèu.
-Iéu crèsi pulèu à un còup dei proumoutour.
-Toujou de poulitico marrido d'en pertout, que ? Sias toujou lou mume, à pica sus lou mume clavèu ! Sabès bèn qu'aro an pu gié de resoun de rima lei terren : poudran pas li basti dessus avans quienze an !
-Quienze an es gaire de tèms quouro sas que pourras li acampa de miliard.
E sènso leissa au Cònsou lou tèms de respouondre, Pèire li dis un adessias finòchou, remounto à l'oustau dóu pastre pèr telefouna à Naïs. Fai bèn, coumençavo de si fa de bilo. Couonto puei lei novo au vièi, e lou quito vers lei nòuv ouro.
L'aureto empacho lou fum e lou cèndre de s'espandi vers la viloto. Emé lou fue darrié leis esquino, Pèire aurié pouscu rèn n'en saupre. Lou soulèu trecoualo, e fai bouon.
***
Quouro arribo à l'oustau de Naïs, coumènço de fa nue. Fin d'avoust, lei jou fan d'acóurchi lèu, e lou negre vèn vite. Parquejo la vouaturo dins la residènci, e pico à la pouarto, qu'es mita duberto. Tranquileta de la nue. Frescour, óudour dei lausié-roso, cri-cri plan-plan emai sènso relàmbi dei grihet, que batran la vido nuechenco à l'après dei cigalo preissado dóu jou. Naïs douarbe, sachènt bèn qu a pica, e lou sarro dins sei bras, tendramen, frumo douço e talamen frumo. Frumo seguro e talamen frumo. Rèston un moumenet coumo acò, esquicha l'un contro l'autro, assabourant lou plesi inmènse d'èstre enfin coumpleta. Si soun pas vist depuei tròu de tèms. Quàuqueis ouro, un jou, dous ? Uno eterneta.
E s'assetoun puei, en brasseto, buvènt quoucarrèn de frès, e si regardant founs, sènso gaire parla. Lou tèms de si retrouba, de si senti, d'intra mai en coumunien. Pichoun à pichoun, l'esmai s'equilibro, e lei paraulo vènoun. Pèire parlo de l'encèndi. Naïs de la journado qu'a passado en famiho. De sei gènt que la sèntoun tant amourouso, curious de n'en saupre mai, sènso vougué la geina de sei questien. Lei demando desguisado dóu paire, lei respouonso de bescànti e bèn apielado de la pichouno souarre, lei fan rire tóuti dous. Pèire, éu, a deja tout di à sei gènt. L'esmai revèn fouart. Si manjoun deis uei. Caranchouno, poutoun, mot d'amour.
Èstre tànti bèn.
***
Aquesto nue, Pèire a de mau à plega parpello. Tardo. Boulego dins soun lié. Si dereviho proun còup, e à cinq ouro, pu mejan de durmi. Si lèvo emé la tèsto lourdo. Parpelejo. Si freto lei tèmpe. Es bagna de susour, e si sènte soun coutet rede.
Pren 'no bouano doucho, d'aspirino, s'abiho de frès. Si sènte miés. Desjuno de quatre figo e d'un gros vèire de jus de poumo.
A sièis ouro, au bouon dóu matin, asseta sus sa terrasso e regardant lei proumiérei lusour dóu soulèu dins lou blu sèmpre clar dóu ciele d'avoust, escouto lei novo à la radio.
Aquèstou còup, parloun de l'encèndi. L'an pas pouscu arresta, e espèroun l'armado pèr douna la man. De mounte s'atrovo, Pèire pòu pas vèire lou ròdou darrié Sanàri. Mai à peno lou soulèu pareissu, sènte lou vènt. Lou mistrau pounchejo. Lou dable es pèr fa bugado : se lou mistrau s'èro leva de nue, aurié dura qu'un pan cue, coumo dis lou prouvèrbi. Mai de matin, e un dijòu, n'en boufo nòu !
"Ai !Ai ! Ai ! Sian mounte leis ai desbastoun !" si dis Pèire, auren de grame à tria, encuei."
Si preparo à pas ana travaia à la banco em'à ourganisa l'ajudo dei gènt de Sanàri pèr lei poumpié. Cargo ùnei vièiei braio en telo de Nime, un sweat-shirt, de vièiei boto, e si souarte de vièi gant espés e soulide, un pauquet petassa, mai bastaran. A sèt ouro, pren lou telefone e lanço lou mot ei coulègo dei Targaire.
Es en li charrant que seis uei toumbo sus lou calendié dei posto, arrapa sus la paret, aqui, à coustat dóu telefone. Aquelo nue passado èro une nue de luno pleno. Vaqui perqué ai pas pouscu bèn durmi.
A nòuv ouro, èroun tóuti 'qui, au pèd de la mountagno, lèst à bagna camié. L'avié mai d'un centenau de voulountàri, de tóuti leis àgi, leva de pichoun, raport au dangié, e de tóuti lei meno. De vièi, de jouèine, d'ome, de frumo, de raplot, de long coumo un jou sènso pan, de gautaru, de mistoulinet, de desbraia, de Lacoste, de gavachot e de mita nus, de brun, de blound, de rouge, e mume un qu'avié lou puou verd, de bèu e de pas poulit, de cuou sarra e de froutuso, de grand couioun e de que s'arraparien au plafound. De tout.
Pèire saludavo lei coulègo, quichavo lei man d'ami d'ami de la cousino d'un counfraire, quand toumbè puei sus un tipe estràngi, que li parlè dins uno lingo coumprenablo, que dounavo d'èr au prouvençau, mai que n'èro pas. Coumo dire ? Uno meno de catalan, coumo un Espagnòu que parlarié prouvençau. O un Roumanesc. Fahié souna de counsono coumo lou tradutour de Chichois. Fenissè pèr dire qu'èro "forrt ahourrros de podèrr parlarr en langa outsitannna app los amix probanssals dabannss las collllinnas arrrdentass". Pèire lou remarciè, virè l'esquino, fè un pichoun saut de gambo en si diant "olé !!!". Avié coumpres l'engano. Sabié mounte aquel ome avié assaja d'aprene lou prouvençau.
S'èroun mes souto lou coumandamen dei poumpié. Aquéli li dounèroun coumo travai, emé de trouçounuso e de desbroussaiuso, de neteja uno bèndo de cinquanto mètre de larjo long dóu camin de la Tourrello e de la Capello Santo Trinido, que ribejavoun l'autorouto, à l'adré dóu Gros Cervèu. Acò farié un coupo-fue qu'empacharié l'encèndi d'ataca l'autorouto e de l'autro man lei proumié quartié de la vilo.
Naïs es aqui. D'uno que crèi dins aquesto bataio, de dous que la vòu parteja 'mé l'ome qu'aimo, e de tres que jamai de la vido dei gàrri aurié leissa Pèire encourre un risco sènso èstre à soun coustat. Éu avié bèn vougu la counvincre que foulié pas que si sentèsse óublijado, mai elo l'avié lèu counvincu qu'èro pas 'no questien d'óubligacien. Questien d'amour. Tant si retroubavoun 'qui tóuti dous, urous, mai qu'urous, d'oubra coutrìo à la memo obro bello e fouarto. De tèms en tèms si mandavoun un regard rajant de fe, mai esclatant enca que sei sourrire.
Tóuti si l'èroun bouta coumo de mouine au vin pur : enrega coumo tuoulisso, en chuermo de vinto-cinq, que si suivoun à trento mètre, vague de coupa, desfounça, derraba, estrema, em'un fue de Diéu, qu'es lou còup de va dire ! Passoun sa ràgi sus lei bartas. E pamens, es pas facile. Caminoun sus de clapo e de roucas, lei caviho toursegudo, lei boutèu esquinta pèr leis espino, crebant de la caud, e s'estoufant de la póusso. Mai qu'enchau ? Lei besougno fan un boucan à reviha de pèiro, e lei planto coupado espetoun. De pichoun moucèu de branco, de fueio, d'espino, de pigno, voualoun d'en pertout, e li sautoun dins leis uei, li pougnoun lei gauto e lou còu, mounte la susou regoulo à gros degout. Aquelo es empeirado coumo lou camin dóu paradis.
La proumiero souco a lei trounçounuso. Coupoun lou pu gros, coumo de cabro que poudoun. La segoundo, emé lei desbroussaiuso, rasclo lou sòu e netejo lou pu pichoun recantoun dins lei roucas de biscànti. La tresiemo amoulouno lou tout emé de rastèu, e la darriero, coumo pèr endùmi, carrejo lei mouloun de bartas escracha dins de gourbeio qu'an cargado sus l'esquino. Jitoun tout acò sus lou bord dóu camin, à l'adré, que de camioun e de treitour 'mé de carreto lou vènoun rabaia.
Lei servìci coumunau s'óucupoun de mena la manjaio, l'aigo, e de souigna lei que li fa besoun. A parti de miejou, la calour leis ensuco. Aquéli qu'an gié de capèu duvoun s'arresta. Lei mai testard bagnoun camié fìncou sièis ouro de l'après-dina.
Lou sero, lou coupo-fue es acaba.
Naïs e Pèire, creba e urous, si retrovoun dins la vouaturo de Pèire. Soun tóuti dous plen de póusso e de chèchou de bauco, lusènt de susou, descouifa, emé lei man salo e esquintado. Moumen de calamo. Silènci. Souspir. Si passoun 'no boutiho d'aigo tèbi. Naïs souarte de la vouaturo e s'en jito sus la figuro e lei chivu. Pèire si refresco parié. Si regardoun, risoun.
Naïs vèn s'apiela contro lou pitre de soun ome, que la pren dins sei bras e li fa de caranchouno douço sus lou coutet e l'esquino. Si laisso massa coumo uno gatouno. Bout dei det. Prefum de la pèu. Bouonur dóu touca. Pèire rèsto puei de la caressa, e li aboundouno sa tèsto contro la siéuno. Grand moumen de douçour.