óuriginoVII
L'endeman de matin, Pèire e Naïs soun encaro au lié à nòuv ouro. L'a gaire qu'an descubert lou bouonur de durmi ensèmble, e n'en soun encaro meraviha de pousqué barra parpello apara, rescaufa, ameisa dins lei bras de l'autre, encaro meraviha de si reviha em'aquesto vesien paradisiaco : lou jou coumènço emé l'èstre eima. Meraviha d'aquesto joio, d'aquel estrambord manse, d'aquéu bèn-èstre e d'aquelo set de viéure, vous assegùri que va saran encaro loungtèms.
Lei pichoun de Pèire an tourna à l'oustau. Soun tóuti dous toumba amourous -à soun biais- d'aquesto bello e gènto frumo que pouarjo tant de bouonur à soun papa, e tant de douço gau dins l'oustau. Es Tildouno, proumiero, que demandara à Naïs de s'istala 'qui de bouon.
Li pensoun.
Talamen que soun escranca de l'obro d'aièr, que Pèire s'es pas leva 'mé lou soulèu. Escouto lou respir lènt, regulié e puissant de la frumo qu'aimo. Penso pu en rèn. Ni fue nimai moustre. Pèr un tèms. Lou tèms de reveni à la vido, de reprene la forço e la fisanço que fòu pèr la viéure urous e plenamen. Vaqui puei leis idèio dóu defouaro que revènoun. saupre se l'encèndi a cala ? Si drèisso plan-plan, assajant de pas reviho Naïs. Douarme tranquilo, estendudo d'esquino, nuso e bello. Pèire s'aplanto un pau pèr amira 'quèstou cors jouèine e fouart, souple e ferme, mince e plen, brun e dous, caud e… basto ! Li passariéu la journado. Barro leis uei pèr s'assegura que pantaio pas. Qu'es bèn elo, qu'es aqui, e qu'es tant poulido. Li douarbe mai. E vo ! Souspiro, ganciho la tèsto, sènte soun couar li fa lou bàti-bàti, e s'en vai dins lou saloun atuba la radio de la cadeno estereò.
Dès ouro, sara pas dificile de trouva d'enformacien.
Revèn dins la chambro. Matiéu lalejo dins soun lié. L'entènde en passant dins lou courredou. Lou laisso juga. Tildo duou encaro durmi. S'ausisse rèn dins sa chambreto. Ben lèu la rintrado. Que si repauve, aquelo princesso.
Naïs douarme plus. Soun respir a chanja. Douarbe leis uei quouro Pèire rintro dins la pèço. Éu si coucho tournamai à coustat d'elo. S'esquichoun l'un contro l'autre sènso quinqua. Au bout d'un gros moumen, lei paraulo arrivoun. Plan. Proumié quàuquei moutet. Pèr si dire bounjou, pèr saupre se vai bèn, s'an bèn durmi, se si soun bèn repauva, pèr si dire soun bouonur, e que s'aimoun. Si rapelloun que si soun endurmi lèu, quasimen sènso parla. Coumènçoun pèr si counta si pantai. Acò es impourtant pèr élei. Pèire, qu'à la debuto si n'en souvenié jamai, a pita au jue, e aro si n'en rapello proun. Si fan rire em'aquéleis istòri estraourdinàri.
N'en revènoun à sa nue.
-Ai durmi que n'en poudiéu plus de fatigo, Naïs dis.
-Ai bèn vist, vai, que mi siéu leva au mitan de la nue sènso que bouleguèsses un artèu.
-Verai ?
-Quasimen. M'as just pres la man quouro mi siéu mai coucha, sènso un regard nimai un pountoun.
-T'ai baia d'abitudo marrido, moun bèu ! li fai em'un èr malicious. E lei novo, siéu seguro que lei siés ana escouta.
-Avèn gagna. Lou fue a creba sus lou coupo-fue, fauto de manjaio. L'avèn agudo, aquelo salouparié.
-Bello vitòri. Em'un pau d'amour…
-E vo ! Em'un pau d'amour… si pòu faire de cauvo grando.
Silènci. E puei Naïs, mai :
-Creses que l'a de gènt que s'aimoun autant que tu e iéu ?
-M'estounarié que n'ague fouaço, mai li souvèti de tout moun couar. As pas remarca coumo lei gènt nous regardoun quand sian ensèn ? An l'èr espanta de nous vèire tant amourous. E urous tambèn. Vouàli dire, an l'èr urous de nous vèire urous. Regard. Bouon, iéu, encuei, anarai pas à la banco. Ai bèn merita un jou de repaus.
-Mai l'a pas 'no semano qu'as repres lou travai ! Vas agué de proublèmo !
-Que proublèmo ? Fai dès an que li travaiéu, e que mi li dóuni bèn. Mi van pas foutre à la pouarto pèr un jou de repaus ! Aquelo empegarié, pamens ! S'anavian passa la journado eis Embiés ?
-Siés fouale, e t'àimi coumo 'cò. Es uno idèio fantastico. Es tout ce qu'aviéu besoun pèr mi remetre deis emoucien d'aièr.
-Iéu tambèn ! E diant 'cò, Pèire pren Naïs dins sei bras, si drèisso, e si mete à dansa dins la chambro en cantant :
Aro qu'avèn tout acaba
Tiraren l'ase
Tiraren l'ase
Aro qu'avèn tout acaba
Tiraren l'ase pèr la coua !
Naïs ris e li dis qu'es fouale, que la fòu lacha. Mai Pèire la tèn soulide e countinuio la farandoulo. D'uno man, aganto un linçòu e la cuerbe. Tildo e Matiéu rintroun puei, e s'apoundoun à la farandoulo, en riènt coumo d'asclo. Après un tour de l'oustau, que Naïs fai sus sei douas gambo, si laissoun toumba sus lei cadiero de la terrasso.
-Vous aviéu alesti un platèu pèr lou desjuna, li fai Tildo, vous fòu ana recoucha !
-Va prendren eici tóuti ensèn, se vouos ?
-Vouàli bèn. Mai m'assèti à coustat de Naïs.
-Sian d'acòrdi !
***
Es à vounge ouro soulamen, en sourtènt preveni la banco, que Pèire apren la tarriblo novo. An bèn restanca l'encèndi à l'adré, mai lei flamo an assaja de garça lou camp pèr lei coustat. An brula tres oustau. Dous vueide. E un qu'es esta lou toumbèu de soun prouprietàri. Aquéu de Cabanel, lou vièi pastre. Es mouart.
Pèire n'en rèsto palafica. Gros silènci. Paraulo de circoustànci. Regretouso. Soucitouso. Verinouso. Uno jouèino que counouisse un pau Pèire fai coumo 'cò, em'un èr voulountous :
-Aquelo bourdiho a quand mume agu la siéuno. A pas fouaço tuia d'aubre, alor s'es facho un ome. Es uno lèpro, vé, uno lèpro que nous rouigo pichoun à pichoun. Sus la pèu dóu païs, pousquessian la vèire d'adaut, es uno placo aqui, uno crousto eila, e tant de mouart… E sarié rèn se l'avié qu'acò, que de planta d'aubre tournamai, va farian, mai es tant de pourridié que nous agarrisse d'en pertout…
-A resoun, apounde un autre, se l'avié qu'acò… L'a puei de mai en mai d'oustau que devourissoun la terro. Quouro èri pichounet, mi rapèlli, e l'a pas tant de tèms qu'acò, qu'ai tout bèu just trento an, mountavias au fort de Sièis- Four, avias uno visto dóu tron de Diéu. D'uno que si li vis quàsi deis Ilo d'Or eis Ilo de Marsiho, e de dous que l'avié dins la planuro, au dabas, entre lei vilàgi e lei viloto, un païsàgi de campagno, de vigno, de vargié. E mume Touloun avié l'èr mens salo. Aro, es rèn que d'oustau d'en pertout. E lou pu piègi, es que d'amoundaut, vias tóuti lei bourdiho que Touloun escupisse dins lou ciele e dins la mar. L'autre jou, creiguèri que li avié lou fue au Mourihoun, e bè, tè ! vai ti fa rascla ! la tubèio èro d'uno fabrico. E vaqui mounte n'en sian. Cresès que l'a de que si foutre en petard ?
-Se l'avié mens de residènci segoundàri e de tibanèu vers lou Gros Cervèu, aurian pas 'gu 'quèstou fue. Lei touristo counouèissoun pas nouaste païs. E vague de ti fa lou barbo-cuou, e de jita lei cigaleto mau atudado sènso faire atencien, e de bricoula lou moutur dóu batèu en escampant d'essènci ! E vaqui la resurto.
Mai o mens counvincu, lou mounde fai vo de la tèsto. D'ùnei que l'a aubouroun leis espalo, o douarboun d'uei de bogo.
-E bè, iéu, dissate, vau à l'acamp dei verd, à Bandòu, la jouèino dis.
Pèire restè soucitous uno bravo partido de la journado. Vouguè pamens ana eis Embiés pèr pas decebre lei pichoun, e perqué sabié que de tout biais, sarié miés dins un bèl endré pulèu que de vira negre embarra dins soun apartamen. Aqui, Naïs sachè parteja sa peno, mai tambèn l'aléuja e li fa reveni lou sourrire. Aquesto frumo es un ravissamen !
L'enterramen dóu vièi pastre siguè un gros moumen de tristesso e de forço. Lou mounde dóu relarg èroun tóuti 'qui. Lou vièi aurié pas vougu de cerimounié religiouso. Es dóu Municipe, Cònsou en tèsto, que tóuti partèroun pèr l'acoumpagna au çamentèri. Aqui, lou Cònsou fè 'no dicho mens couiouno qu'à l'acoustumado. Èro pas mai lou pouliticaire que barjavo, mai lou Sanarien que parlavo au noum d'uno vièio amista, e d'uno soulidareta.
***
Dissate que vèn, l'a aquel acamp deis ecoulougisto, e Pèire li penso. Lou tafuro. Si dis que lei partit pouliti establi, dóu coumbat dei Targaire de Sanàri pèr apara soun endré, s'apara éli-mume, e si basti un aveni mai san, si n'en soun toujou foutu coumo de sei proumiérei braieto, e que va pas chanja. Lei Verd, élei, soun nòu. Soun en defouaro dei coustumo poulitico franceso. Soun pas de Paris. E sèmblo bèn que pèr lou mens toucant lou campèstre, seis idèio s'endevènoun just e just em'aquélei dei regiounalisto. Perqué pas assaja de li counouisse un pau miés ? Vèire ce qu'an vertadieramen dins lou coucot. E se va bèn, bè, perqué pas li fa vèire que fòu tambèn tout un proujet de soucieta dóu respèt, e qu'es ensèmble emé lei regiounalisto que va pouadoun fa teni dre ?
Mai fòu proumié n'en counvincre lei Targaire !
D'abitudo, Pèire passavo lou dissate après-miejou au Cèntre de Culturo Prouvençalo. Uno meno de grand mèmbre, louga au Municipe, que fai au còup bibloutèco e burèu. Aqui, an pouscu croumpa, emé d'ajudo de la Regioun, tout ce que fòu : telecòpi, foutoucoupiuso, ourdinatour em'estamparello lasèr, libre, e que sàbi iéu… L'a uno grando taulo cuberto d'uno touaio de souleiado, quàuquei cadiero, e d'armàri de fèrri contro lei paret. Aqui dedins, mai de cinq milo libre. La majo part de la literaturo prouvençalo editado, e de mouloun d'oubràgi raport à la culturo prouvençalo. Es ralamen un dei mai gros cèntre de boulegadisso dóu relarg varés. Un brave travai !
Li passavo tambèn de còup que li a lou sero, après lou travai de mestié, pèr escouta lei messàgi au respoundèire, liegi lou courrié, regla quàuqueis afaire. Un còup lou mes, lou Counsèu d'amenistracien s'acampo. Un divèndre après soupa. Parlara dei Verd divèndre que vèn, vèio de l'acamp de Bandòu. Sara tardié, mai coumo faire ?
Entre tèms, Pèire viéu soun paradis. Segu que travaio un pau mens à sèis idèio, mai un ome a besoun de bouonur e d'amour. Aro que l'a trouva, a bèn lou dre d'alenti un pau, e de si prene lou plesi de viéure. Naïs travaio, aro. A trouva uno plaço de respounsablo dei crèdi dins uno agènci de la Soucieta Marsiheso, à Touloun. Es tout urouso, e un pau inquieto, d'aquéu mestié que voulié dempuei l'an pèbre. Lou sero, passo à soun apartamen prene lou courrié e regarda se tout va bèn, e s'en vai puei rejougne Pèire e lei pichoun plaço Cavet. Pèire li preparo de manjaio requisto. Lei pichoun l'aculissoun emé de poutoun, de jue, e de joio. Après soupa, un còup la ninèio couchado, si retrovoun soulet, si racontoun sa journado. Parloun. O de còup dien pas rèn. Rèstoun asseta, en brasseto, gauto contro gauto, sènso boulega. Sabour d'un amour parteja. Bèn-èstre.
Tèms en tèms, se Pèire duou sourti lou sero, coumo pèr eisèmple s'a un acampado dei Targaire, elo gardo lei pichoun.
E la fin de semano, que lei pichoun s'en van siegue à sa grand, siegue à sa maire, douarmoun, proumenoun, fan de biciéucleto dins la campagno, van si bagna, o si fan un councert de blues à La Sèino avans d'ana soupa d'uno ensalado e d'un bouon còup de vin dins uno aubergo dóu cantoun. Si cercoun toujou de poulits endré, tranquile e calourous.
An bello à s'èstre toujou di que farien plan, qu'uno bello istòri d'amour, acò demando de tèms, de prudènci, e patin coufin, lou couar l'empouarto sèmpre sus la resoun, e sènso si va counfessa, lei vaqui que vivoun ensèmble despuei tout aro un mes. Retrovoun sei dat en si diant que fòu viéure aquéleis cauvo coumo lei sèntes, e que se soun urous coumo acò, an resoun.
A l'ouro dicho aquèstou divèndre de fin setèmbre, lou Counsèu dei Targaire soun tóuti 'qui. L'ordre dóu jou es proun carga, coumo sèmpre, mai Pèire pren quand mume lou tèms de dorbi la sesiho emé seis idèio raport eis ecoulougisto. A un pau broumeja en mandant quàuquei telefounado, e, ma fisto, sei coulègo an pulèu l'èr de bèn li pita. L'a qu'un estèu, es lou coustat pouliti. Dóu moumen que l'a un partit pouliti ecoulougisto, mai o mens liga au partit soucialisto, em'en de mouvamen tiers-moundisto, lei Targaire tant poudrien si n'escalustra. Coumo tóuti lei mouvamen prouvençalisto, voualoun metre la lucho regiounalisto en dessus, o defouaro, dei idèio poulitico franchimandejanto. Mai n'a que crèsoun qu'acò vòu dire que ce que fan à rèn à vèire emé la poulitico. Courto visto, segu, mai proun courrènto. Que permete de passa à coustat deis idèio founso, dei countristo fouarto, e bessai, Pèire va saup, deis acien eficaço. Si rapello, coumo tóuti, de l'epoco que lou Feblinige èro toumba dins lei man d'adouratour de la soupo au pìstou, e que sarvié rèn qu'en de gros repas, toujou coumença pèr uno soupo au pìstou, e toujou feni pèr l'inne dei pistaire : La Soupo Canto . Lou refrin li revèn dins l'auriho : "Soupo canto ! He ! Servanto ! Vueje à plen bord…" Acò li avié pas fa de bèn, au Feblinige, e encaro mens à la causo regiounalisto e federalisto.
Es à parti d'aquelo questioun que Pèire mando lou le. Emé quàuqueis àutrei, demouastro eisa que sènso acien proupramen poulitico, capitaran jamai veraiamen, e que de travaia emé d'ourganisme pouliti leis embarro pas. Poudran resta de camina em'élei lou jou qu'anara pu. La discussien sara longo, aqui subre, mai enfin pèr aro, lou Counsèu douno soun acouàrdi pèr que Pèire coumènce de prene lingo emé leis ecoulougisto.
Saupre se sara la belugo dóu cacho-fue ? Se enfin la lucho regiounalisto prendra l'envanc que s'amerito pèr la Nacioun Prouvençalo ?
***
Fin de l'autouno. Lou lume es dous. Lei vèspre frès. Lou soulèu tranquile. Oudour aspro de la terro bagnado après lei raisso. Rous e daura de la naturo que pren de forço. La rintrado s'es facho. Naïs e Pèire soun urous. Lei pichoun fan soun camin. A l'escolo, vai bèn. Franc d'un estampèu qu'an degu faire à la debuto. Uno proufessouresso de francés dóu coulègi, uno agregado de mai qu'a pouscu davala de soun Uba natau e rauba un poste à un dóu païs, s'èro messo dins la tèsto de "neteja" lou parla de seis escoulan, e de lei fa parla pounchu. Uno grèvo dei parènt d'escoulan avié feni pèr desrenja l'ispeitour d'acadèmi, e la frumo avié fa arrié. Èro pas tòti, nàni, mai s'èro pas rendu comte qu'arrivavo dins un autre païs.
Pèire e Tildo arrivoun à l'oustau au mume moumen. Risoun en si viant. Es à qu sourtira sa clau lou proumié. Tildo, entrepachado pèr soun cartable, e soun pichoun fraire qu'a mena de l'escolo, pèrde la courso. Pèire a rèn dins lei man, e 'no pòchi à sei braio…
Coumènço de liegi lei letro. A pas agu lou tèms de mounta à miejou. Cadun raconto puei sa journado, e soun dina. La cantino es pas au guide Michelin !
Après s'èstre refresca lou mourre, s'en van tóuti tres, man dins la man, croumpa de que soupa au Casinò dóu balouard de l'Aveni, au bout de la carriero Giboin. Naïs sara pas 'qui avans sèt ouro, sèt ouro e miejo. An bèn lou tèms de cousina quoucarrèn de bouon.
***
Es un dimècre que tóuti leis escoulan de Sanàri van planta d'aubre nòu sus l'adré dóu Gros Cervèu. A magimen brula dóu caire de la Pioto e dóu Lançoun. Quàsi rèn sus la Coualo, e rèn de rèn à l'Uba, dóu coustat de la Barro de Jaume, vers Lou Bausset.
Lei mèstre, mestresso e proufessour soun tóuti 'qui, emé de gènt de la D. D. E. e dóu municipe, encarga de li moustra coumo faire. Fouaço parènt an acoumpagna sei pichoun, e Pèire tambèn.
Es uno bello journado de nouvèmbre, e fòu planta lei jouèineis aubre avans la fre de l'ivèr. La naturo a ja repres vido. De tousco de farigoulo, de roumanin, de lentisco, de bouis an ja pouncheja. La garrigo crèisse. Lei pègi deis aubre mouart, negre coumo lei pivo d'un leco giganto e diaboulico, que semblavoun de pau après lou suplìci, soun deja esta leva.
A nòuv ouro petanto, lei souco de pichoun s'esparpaioun, cadun esquichant sus soun pitre un aubre-nistoun, roure, suve, pin pignoun, pin bastard …
Pèire Pradet s'afeciouno à ajuda l'istitutriço de Tildo qu'a en cargo un desenau de pichoun. D'un còup, elo lou souano :
-Moussu Pradet, venès vèire !
-Que l'a ?
-Ai vist quoucarrèn courre, amoudaut, fai en li moustrant dóu det lou naut dóu valoun mounte travaioun.
-Quoucarrèn ? Coumo èro ?
-Uno meno de nanet, uno persouno, bessai.
-Fòu l'ana vèire !
Pèire chifro. Li ramento soun esmai quouro, emé lou paure pastre, avien coucha lou "moustre". Saupre s'a subreviscu au fue, e s'es pas éu, toujou 'qui, escoundu dins un trau, sourtènt qu'à nue pèr bousca sa manjaio ?
-Vous pouàdi leissa lei pichoun ? Móunti.
Jito luchet, bechard, rastèu, pren sa douiro d'aigo, e grato camin vers lou cresten de la coualo. A mié-mountado, rescontro uno autro souco de pichoun jardinié. An descubert un biais de pichoun cafóuchou dins lei roucas. Lou mèstre li a enebi de rintra dedins. "Aquèstou còup, li sian", Pèire si penso. La bèsti a degu leis entèndre mounta, a 'gu la petacho, a garça lou camp. Fan de petard coumo a bèn puscu soufri lou fue ? S'escaufo soulet, tout urous d'agué mai enrega lei piado dóu moustre. N'en ris. Si parlo. Lou prendriés pèr un fadòli.
Quouro aprocho dóu ròdou que la mestrèsso li a fa vèire, fa plan. Afusto uei em'auriho, camino sènso fa de brut. Regardo à l'entour. Fai tres cambado e s'aplanto. Espincho de tóuti lei caire. Dabas, vis lei souco de pichoun. D'aqui en aqui. S'atrovo quàsi à l'autour de la barro. A 'no visto manifico sus Sanàri. A drecho em'à gaucho, aperaqui à un kiloumètre, la fourèst es gaiardo. L'a que souto éu, aquesto cicatriço badiero. Coumo s'uno batuso giganto avié toundu lou coustat de la mountagno.
Saup gaire coumo faire pèr trouva la bèsti sènso la coucha. Si mete à tafura plan plan dins la bauco e lei bartas em'un bastoun. Fai avans en ourdurant soun camin, un brigoun d'asard. Tabasso lei bouissoun despuei uno grosso miechouro quouro, coumo li vèn en òdi de fa chi, qu'a caud, qu'a set, qu'es las, e que vai s'arresta, pren lou couquin de Diéu, e pico coumo un foualo deis douas man sus uno broundo qu'es aqui davans.
Un brut darrié. Un brut de fuiàgi. Pèire si reviro. Lou brut s'es arresta. Pico mai. Lei bartas boulègoun à cinquanto mètro d'aqui, sus lou cresten. Pèire chifro lèu. Diriés un ourdinatour de la N. A. S. A. Fòu pas que lou moustre passe la barro e davale dins la fourèst de l'uba. Lou perdriéu, de tout segu. Lou fòu fa descèndre à l'adré. Vers lou mounde, en terro nuso. Alor Pèire boulègo emé fouaço sang plan, sènso gié de brut. Douçamen, remounto à la barro, en mié ciéucle, siblant un èr pivelaire entre lei dènt. Camino souple coumo un gros gat que casso un gàrri. Uno fes amount, s'aplanto, si drèisso, e sourris, gai coumo un din-din de campaneto. Aleno un brave còup pèr si baia de voio, e zóu, à la descèndo lei cougourdo li van ! Pico un grand còup de bastoun.
Subran, la bèsti boulègo. Pico mai. Fugisse avau. Acò marcho. Pico tournamai e la suive. Si retèn de courre pèr pas li douna la panico, que Diéu saup coumo reagirié. En quàuquei menuito, la bèsti s'aprocho dei souco de plantaire. An coumpres. L'istitutriço es au mitan. Si dounoun tóuti la man, e fan un mié ciéucle. Un bèl arret.
La bèsti s'aplanto. Es toujou mita 'scoundudo souto lei bouissoun. Pèire tabasso mai. Un assai pèr fugi à drecho. Un assai à gaucho. Un còup de bastoun pèr sòu.
La bèsti quilo. D'un crid que gielo lei sang. Un cris espaventable. Fouart, agu, long, rascla e moudula.
Un crid uman.
Degun brando plus. An pòu. Lei mestrèsso saboun pu se faire garda lou ciéucle o apara lei pichoun. S'entreregardoun, atupido. Pèire es pivela.
Pico mai.
Alor… la bèsti si drèisso. Souarte la tèsto, lou pitre, leis anco, de la garrigo.
A 'no tèsto, … 'no tèsto… De pichoun s'escapoun en plourant, d'àutrei creidoun de l'escaufèstre, d'àutrei soun empeira e n'an leis uei que sèmbloun que van sourti dei trau. Pèire es pivela. A 'no tèsto umano. Uno figuro salo, negro, esquintado, mai uno caro de frumo.
Emé de grands uei negre e 'no cabeladuro que li toumbo sus l'esquino, sus leis espalo, e sus lei bras. A un restant de braio sus lou cuou e sus lei cueisso. Un rèire-jeans. Uno vièio camié traucado que li toumbo à peio sus lou cors.
Silènci. Espés. Lourd.
Tout lou mounde es parti. Pèire es aqui soulet. Aubouro lou bras, e, la man tesado e duberto, regardant la frumo bèn dre, avanço.
Elo si laisso toumba, assetado, tremoulanto de pertout, e gancihado dei gros senglut. Sènso un brut, sènso uno larmo.
***
Prenguèroun, pèr rintra à l'oustau, lou camin deis endéuta. A la debuto, un còup la fiho sóuvàgi menado à l'espitau pèr lei poumpié, e lei pichoun enana 'mé sei gènt, avien rèn di.
Naïs èro mountado rejougne Pèire que l'avié sounado dempuei la vouaturo dei poumpié. La fiat leis esperavo, e mountèroun dedins coumo d'óulivo au moulin. Pèire metè lou moutur. Si regardèroun. L'èr esbalauvi. Naïs fè bouqueto, timidamen, e Pèire l'avié preso dins sei bras.
Sus la routo, tout d'uno, parloun en mume tèms. Li arrivo souvèntei-fes de pensa ei mùmei cauvo au mume moumen, e d'entèndre l'autre n'en parla entàntou que l'an encaro dins l'idèio.
Acò lei fa rire.
Naïs parlo mai :
-Pèr un moustre, que moustre ! Es poulido, la fiho, sas.
-Qu v'aurié pouscu imagina ? Lou diable pouarto pèiro…
-Lei gènt an lèu fa de si farga de fantasmagourìo que li agradoun.
-Vai saupre !
-Fin finalo, uno fiho de vint an, fugissènt la guerro de soun païs, intrado clandestinamen en Franço e sènso un sòu, vióulado e batudo saupre pèr qùntou moustras que bessai li toques lei cinq sardino à la banco, e que s'escounde dins la coualo. La baumo di Garou a encaro sarvi.
-Urousamen que l'avié un poumpié fiéu d'emigrat que sabié sa lingo !
-De qu'a bèn pouscu viéure, tout l'estiéu e touto l'autouno ?
-De frucho, de cacalauso, de racinun, de pignen, de liéume fèr, d'uou trouva dins lei nis, que sàbi iéu…!
-E l'aigo ?
-L'a de servo d'en pertout, eis Uganòuvo, à la Pioto, à la mino de Grès ; l'a la fouont dóu valat de Fountaniéu, e de rau de tóuti lei coustat. E lou canau de Prouvènço qu'arrivo enjusqu'aqui. Rapello-ti la legèndo di masco de Cassis, que si sarien escoundudo au Gros Cervèu, à passatèms. E la de Gaspard de Besso, emé soun trau de l'autro man de la Repo, tout parié.
-As resoun. Es poussible. Empacho pas qu'aquelo tubo.
-Coumo ? Es poussible ? La provo bello !
-Saupre se poudra tournamai viéure nourmalamen ?
-Perqué pas ? Pèire respouonde. E que vòu dire "nourmalamen" ?
-Sara pas eisa. Fouaço mounde la rebufaran, e lou restant si n'en foutra coumo de l'an quaranto.
-Basto quàuquei gènt bèn tanca pèr fa targo, sabes.
Après agué proun vira e mai vira entre Lou Bausset, La Cadiero, Bandòu, Ouliéulo e mume lou Revèst, darrié Coudoun, arrivoun à Sanàri.
Jan, lou journalisto dóu "Provençal" es aqui, davans l'oustau de Pèire. L'espèro em'un sourrire brave, un pau tristet.
Leis àutrei journalisto soun tóuti à l'espitau de Touloun, en trin d'assaja tóuti lei mejan de rintra dins la chambro d'aquelo que, sènso cerca soun noum, l'an ja mes "la Sóuvàgi dóu Gros Cervèu". Aquéu qu'arrivara de li foutougrafia lei tetè aura bèn capita.
Es lou quatre de desèmbre d'aquelo anado que tout espetara. Leis oubrié dei Chantié Navau n'auran soun proun d'entre ganciha entre un gouvèr amoundaut que lei counouisse pas, lei trento-sièis tentativo de represo, pèr de gros catau estrangié, e lei deputat de l'endré que si charpinoun pèr n'en tira lou pu gros pes eleitourau poussible.
Pescaire, oubrié, païsan, ensignaire, pantaiaire, patroun, Prouvençau o noun, mai tóuti uni pèr si basti uno Prouvènço de deman que li viéuran bèn, bloucaran lei routo, lei port, leis aireport, lei camin ferra. Prendran la telè e lei journau. Ecoulougisto e regiounalisto, biciéucletisto e pedagougisto, artisto e poumpisto.
Canjuers, Carpiagno, Aubioun e Sièis-Four saran liéura.
Bretoun, Basque, Biarnés, Savouiard, Chti'mi e tóuti leis àutrei rintraran dins la farandoulo.
Lou quatre de desèmbre d'aquelo anado.
Quant de vouas amudido aujaran creida ? Quant de laisso-m'esta calara ? Quant de mussonjo saran tuiado ? Quant de braveta espandido ?
Lou quatre de desèmbre d'aquelo anado d'aqui.
Pèire amouasso lou lume de la foutoucoupiuso, e pauvo lou paquetas de papié sus la grando taulo. A tira un milié d'aficho. E l'estampaire a en cargo dès milo fuiet. Tout acò sara espandi dins lou relarg.
Toujou perdu dins sei pensado, si rapello un passàgi d'un libre que s'es estampa dins sa memòri. Dins soun libre De la Démocracie… Tocqueville a imagina en 1835 coumo lou despoutisme poudrié s'escoundre souto lou vèu demoucrati : "Un mouloun d'ome parié em'egau, cadun de soun coustat, es estrangié à l'aveni dis àutri : sis enfant e si ami proche soun touto l'umanita pèr éu, e se pòu dire qu'a pas mai de patrìo. Après agué pres cado persouno dins si man pouderouso, e l'agué pastado coume i'agrado, l'Estat soubeiran estènd si bras sus la soucieta entiero, la cuerb de pichòti règlo coumplicado, besuqueto e uniformo, que lis esperit li mai óuriginau e li mai vigourous poscon pas sourti de la moulounado; Roump pas li voulounta, lis anequelis, li plego e li mestrejo; óublijo raramen d'agi, mai s'óuposo de longo is agissamen; tuio pas, mai empacho de naisse; es pas un tiran, mai gèino, embèstio, boustigo, rènd bestias em'atupi; fin finalo apichounis cado nacioun pèr n'en faire qu'un troupèu d'animau crentous e travaiaire que l'Estat n'es lou Pastre. Ai toujour pensa qu'aquesto meno d'esclavitudo, reglado, douço, tranquilo, poudrié s'escoundre mies que l'on crèi souto quàuquis uno di formo aparènto de la liberta, e que ié sarié pas impoussible de s'istala meme souto lou vèsti de la soubeiraneta dóu pople."
L'a de que si demanda se justamen, coumo dihié Mistral, si sian pas fa "aplati souto lou roulèu de Paris", gentamen, demoucraticamen, centralistamen, e dramaticamen…
Pestelo la pouarto e s'en vai vers soun oustau. En passant, saludo lou boulengié, que barro boutigo. Es la fin de l'an. D'estello parpelejanto d'en pertout dins lei veirino e lei carriero. Emé la nue, la fre toumbo.
Mai Pèire a pas fre.
Sanàri es tranquilo. Un pau de trafé long dóu port, coumo à l'acoustumado. Lei lume à l'entour dei paumié, e lou clouchié dessina dins la nue pèr la telaragno lusènto que lou bourdejo. Lou negre empacho de vèire après lou faro, que mando soun lume rouge en mar coumo en terro.
Saupre se la sourtido dóu port es libro o tapado ? Basto d'uno sardigno, que si dis dei Marsihés.
Rintro à l'oustau. Fai bouon. Naïs travaio au burèu. Lei pichoun juegoun davans la telé atudado.
Pountounejo soun mounde, e s'asseto à coustat de la frumo qu'aimo. Sènte bouon.
-De que li parlaras, deman, à teis estagiàri ?
-Deis endustrìo de la Mar de Berro.
-L'a de que n'en dire…
-Es just e just ce que m'interèsso. T'entournes dóu CCPT ?
-E vo ! Aviéu d'aficho à tira.
-T'arrestaras puei jamai ? Sabes que fòu cala e s'abandouna ei pauveto em'au plesi, tèms en tèms. Targa vau pas dire fa tintèino.
-Vo, pèr recarga la batarié. Emé tu, pèr tu, tout contro tu.
Naïs a soun bèu sourrire. Li fa :
-L'a mant un biais d'èstre, pèr iéu, es en estènt que si fa targo. E pèr tu es en fènt targo que siés. Si coumpletan bèn.
-E fèn bèn targo ensèn.
THE END … ?
Sanàri, Sièis-Four,
Nanto de Bretagno
1989-93